Balqash dámhanasyndaǵy atysqa qatystylar izdestirilip jatyr
BALQASh. KAZINFORM — Balqashtaǵy dámhanalardyń birinde tanystar arasynda týyndaǵan janjal tóbeleske ulasyp, travmatıkalyq qarý qoldanylǵan. Oqıǵa saldarynan daıashy zardap shegip, is tergeýi óńirlik polıtsııa basshylyǵynyń baqylaýyna alyndy.
Balqashta polıtseıler qaladaǵy dámhanalardyń birinde bolǵan jáne atyspen aıaqtalǵan janjalǵa qatysqan barlyq tulǵalardy anyqtady. Bul týraly Qaraǵandy oblysy polıtsııa departamenti málim etti.
Vedomstvonyń málimetinshe, oqıǵa 21 mamyr kúni tún ortasy shamasynda bolǵan. Dámhanaǵa kelgen tanystar arasynda kıkiljiń týyndap, kóp uzamaı ol tóbeleske ulasqan. Janjal barysynda travmatıkalyq qarý qoldanylǵan.
Oqıǵa saldarynan dámhana daıashysy jaraqat aldy. Er adam oqtan jeńil jaralanǵan.
Atalǵan fakti boıynsha qylmystyq is qozǵaldy. Polıtsııa málimetinshe, oqıǵaǵa qatysqan barlyq azamattardyń jeke basy anyqtalǵan. Qazirgi ýaqytta quqyq qorǵaý organdary kúdiktilerdiń júrgen jerin anyqtap, olardy ustaýǵa baǵyttalǵan jedel-izdestirý sharalaryn júrgizip jatyr.
Polıtsııa departamentinde tergeý barysy Qaraǵandy oblysy PD basshylyǵynyń erekshe baqylaýynda ekenin atap ótti.
Tergeý múddesine baılanysty ózge aqparat ázirge jarııa etilmeıdi.
Buǵan deıin Óskemende polıtseıdiń qarýyn tartyp alyp, oq atqan kúdiktiler ustalǵanyn habarlaǵan bolatynbyz.
