Balyq sharýashylyǵy komıtetiniń tóraǵasy taǵaıyndaldy

ASTANA. KAZINFORM – Serik Sermaǵambetov QR AShM Balyq sharýashylyǵy komıtetiniń tóraǵasy bolyp taǵaıyndaldy, dep habarlaıdy Aýyl sharýashylyǵy mınıstrligi.

Serik Saǵıtjanuly Sermaǵambetov 1965 jyly 29 qańtarda Qyzylorda oblysy Qazaly aýdanynda dúnıege kelgen.

«Ekonomıst» (Almaty halyq sharýashylyǵy ınstıtýty) jáne «zańger» (L. N. Gýmılev atyndaǵy Eýrazııa ýnıversıteti) mamandyqtary boıynsha eki joǵary bilimi bar.

Eńbek jolyn 1988 jyly Almaty qalasynda Balyq sharýashylyǵy mınıstrliginiń ortalyq materıaldyq-tehnıkalyq jabdyqtaý bazasynda bas ekonomıst bolyp bastaǵan.

Ár jyldary Qyzylorda balyq zaýytynyń ekonomıst-qarjygeri, ákim apparatynyń aǵa ınspektory, Qyzylorda oblysy apparatynyń basshysy, Qyzylorda oblysy Shıeli aýdany ákiminiń orynbasary, Qyzylorda oblysy Kásipkerlik jáne ónerkásip basqarmasynyń basshysy qyzmetterin atqarǵan.

Sondaı-aq, Qyzylorda oblysy Jalaǵash jáne Aral aýdanynyń ákimi, «Baıqońyr» ÁKK AQ UK Basqarma tóraǵasynyń orynbasary qyzmetterin atqardy.

Taǵaıyndalǵanǵa deıin Qyzylorda oblysynyń Tabıǵı resýrstar jáne tabıǵatty paıdalanýdy retteý basqarmasynyń basshysy qyzmetin atqardy.

Buǵan deıin habarlanǵandaı, Atyraý oblysynyń ekonomıkalyq tergeý departamentine jańa basshy taǵaıyndaldy.