Balyq ósirýshilerge 2,6 paıyzben bıýdjettik nesıe berilmek
ASTANA. KAZINFORM – Elimizde balyq ósirý baǵytyndaǵy ınvestıtsııalyq jobalarǵa 2,6 paıyzdyq mólsherlememen jeńildetilgen nesıe berý máselesi pysyqtalyp jatyr. Bul týraly AShM Balyq sharýashylyǵy komıtetiniń tóraǵasy Narıman Júnisov aıtty.
«Úkimettiń keńeıtilgen otyrysynda Prezıdent aýyl sharýashylyǵyn qarjylandyrýdy 2 esege arttyrýdy, onyń ishinde ınvestıtsııalyq jobalarǵa jeńildetilgen kredıtter kólemin 800 mlrd teńgege deıin jetkizýdi tapsyrdy. Osyǵan oraı qazirgi ýaqytta balyq sharýashylyǵyn damytýdyń júıeli máselelerin sheshý úshin belsendi jumys bastaldy. Atap aıtqanda, birinshi akvaósirý salasynda sýbsıdııalar berýdi biryńǵaı memlekettik aqparattyq júıege kóshirý boıynsha jumys júrgizilip jatyr», - dedi komıtet tóraǵasy Májilistegi «Akvaósirý týraly» zań jobasyn talqylaýǵa arnalǵan dóńgelek ústel otyrysynda.
Onyń aıtýynsha, bul sýbsıdııa alýshylar úshin ony tegin paıdalanýǵa jáne bıznestiń artyq shyǵyndaryn boldyrmaýǵa múmkindik beredi.
«Ekinshi, búgingi tańda ınvestıtsııalyq jobalardyń bastamashylary kóbinese jeńil nesıege qol jetkize almaıdy. Sondyqtan, olar jobalaryn toqtatyp, ýaqyt joǵaltýǵa májbúr. Bul úshin senim bildirgen agent arqyly 2,6 paıyzdyq tómendetilgen mólsherlememen ınvestıtsııalyq jobalarǵa bıýdjettik nesıe berýge qarajat bólinetin bolady. Búginde mınıstrliktiń erejelerine ózgerister engizilip jatyr. Qarjy mıınstrligine tıisti bıýdjettik ótinim joldandy», - dedi ol.
Komıtet tóraǵasynyń aıtýynsha, úshinshiden, balyq ósirýge arnalǵan negizgi komponentterge tólenetin sýbsıdııalardyń shekti baǵalary olardyń qoldanystaǵy naryqtyq baǵalaryna sáıkes kelmeıdi. Dál osy jaıt bıznes úshin ózekti másele bolyp tur.
«Bul naqty salynǵan qarajattyń 30-dan 50 paıyzǵa deıingi kóleminde ótem alýǵa múmkindik bermeıdi. Osy máseleni sheshý úshin qoldanystaǵy sýbsıdııalaý erejelerinde baǵalardy jańartý jáne tártipti durystaý boıynsha ózgerister engizip jatyrmyz.», - dedi Narıman Júnisov.
