Balet ártisteriniń zeınetkerlik jasyn tómendetý qajet pe

ASTANA. QazAqparat - QR Mádenıet jáne sport mınıstri Arystanbek Muhamedıuly balet ártisteriniń zeınetkerlik jasyn ne sebepti tómendetý qajettiligin túsindirip berdi, dep habarlaıdy QazAqparat tilshisi.

QR Parlament Májilisinde ótken Úkimet saǵatynda Májilis depýtaty Gúlnar Bıjanova balet ártisteri men úrlemeli aspap mýzykanttarynyń jumys ereksheligi máselesin kóterdi.

«40-50 jasqa tolǵan balet ártisteriniń balet partııalaryn oryndaǵanyn elestetý qıyn. Úrlemeli aspap oryndaýshylary da 45 jastan keıin kásibı syrqatqa shaldyǵa bastaıdy. Mınıstrlik mádenıet qyzmetkerleriniń jekelegen sanattary boıynsha zeınetaqysyn jeńildikpen qaıtarý máselesin qaraý nemese ózgerister men tolyqtyrýlar engizýdi josparlap otyr ma?», - dep saýal joldady depýtat QR Eńbek jáne áleýmettik qorǵaý vıtse-mınıstri Svetlana Jaqypovaǵa.

Óz kezeginde vıtse-mınıstr mekemeniń balet ártisteri men orkestr qyzmetkerleriniń zeınetkerlik jasyn tómendetý máselesin qarastyrmaǵanyn jetkizdi.

Sondaı-aq, Arystanbek Muhamedıuly balet ártisteriniń zeınetkerlik jasy máselesiniń materıaldyqtan buryn, moraldyq jaǵy bar ekenin atap ótti.

«Balette shamamen 40 jasqa deıin óner kórsetýge bolady. Qyryqtan keıin sahnaǵa shyǵýdyń ózi kúlkili. Árıne, olardy dalada qaldyrmaıdy jáne aqshasyz qaldyrmaý úshin shtatta ustaıdy. Shtat shekteýli bolǵandyqtan, jas talanttardyń jolyn bógep otyrmyz», - deıdi mınıstr.

Mınıstrlik basshysynyń aıtýynsha,  50 jasynda jalaqy alyp, biraq sahnaǵa shyqpaıtyn ártister ózderin masyl sezinedi.

«Kóptegen jasy kelgen balet ártisteri óz erikterimen jumystan ketedi. Shtatta turǵansha, basqa ispen aınalysaıyn deıdi. Ómir boıy bir mamandyqty, baletti meńgergen adam árıne, ekonomıst bolyp ketpeıdi. Úrlemeli aspap oryndaýshylarynyń da jaǵdaıy osyndaı. 60 jasta kerneı, trombonda oınaý - fızıologııalyq turǵyda múmkin emes. Sondyqtan, olardyń keıbiri ákimshilik jumyspen aınalysatyn kitaphanashy nemese ınspektor bolyp ketedi, bul jumystyń ózi bárine tabyla bermeıdi», - dep atap ótti A.Muhamedıuly. 

Arystanbek Muhamedıulynyń aıtýynsha, Qazaqstandaǵy balet ártisteriniń sany myńǵa da jetpeıdi.

«Úrlemeli aspaptar da sol shamada. Olardyń sany el ekonomıkasyna shyǵyn keltiretindeı kóp emes», - dep óz sózin túıindedi mınıstr.