Balasy menıngıtke shaldyqqan almatylyq kelinshek dárigerlerdiń selqostyǵyna shaǵymdandy
Janar Sadýaqasovanyń aıtýynsha, uly juqpaly aýrýlar aýrýhanasynda 4-kún jatyr. Oǵan «sirli menıngıt» dıagnozy qoıylǵan. Úlken qyzy onymen baılanysta bolǵanyna qaramastan odan tekserýge qan da almaǵan. Al ekinshi qyzy men ulyna pýnktsııa (julynnan suıyqtyq alý) jasaǵan. Al medıtsına qyzmetkerleri olarǵa aýyrsynýdy basatyn dári-dármek salmaǵan.
«Balalarymnyń aıǵaıy ómir boıy qulaǵymnan ketpesteı boldy», - deıdi ol.
Balalardyń anasy protsedýra jasar aldynda anestezııa nelikten qoldanylmaǵanyn bilgisi keledi.
«Birneshe kúnnen keıin balama bul protsedýradan qaıta ótý kerek. Eger syrqatynan jazylmasa, qaıta jasalady jáne aıyǵyp ketkenshe jasala beredi. Osy aýrýhananyń 6-bóliminde jatqan barlyq balalar osy protsedýradan ótedi. Eger anestezııa bar bolsa, balalarǵa nelikten salynbaıdy? Qarjy joq pa? Álde bizdiń balalarymyz shydaı turýy kerek pe? Kóptegen aqparattyq saıttardy qarap shyqtym. Pýnktsııa alar kezde anestezııa salynatyny taıǵa tańba basqandaı jazylǵan. Men aýrýhana dárigerlerinen jaýap alǵym keledi. Jáne naýqastarmen baılanysta bolǵan, jedel járdemmen jetkizilgen balalardan nelikten tipti qan alynbaıdy?», - dep jazady ol.
Almaty turǵynynyń bul shaǵymyna Balalar juqpaly aýrýhanasynyń bas dárigeri Erjan Seralın jaýap berdi.
«Qurmetti Janar Sadýaqasova. Men atalǵan aýrýhananyń bas dárigeri retinde lıýmbaldy pýnktsııanyń óziniń kórsetkishi bar ekendigin aıtamyn. Naýqasta ıntoksıkatsııa belgileri, bas aınalýy bolsa ǵana pýnktsııa jasalady. Algorıtm boıynsha pýnktsııa aldynda 0,5 paıyz novokaın nemese 1 paıyz lıdokaın jergilikti salynady», - dedi bas dáriger.
Sonymen qatar dáriger jaqyndarynan analız alynbaýyna baılanysty túsinikteme berdi.
«Sirli (vırýstyq) menıngıt menıngokokk juqpasy emes. Sirli menıngıtte jaqyndarynan qan alýdyń qajettiligi joq. Al menıngokokk juqpasy 11 maýsymnan bastap tirkelgen joq», - dedi Erjan Seralın.
QR DSM taratqan aqparatqa sáıkes, Qazaqstanda qazirgi tańda menıngokokk juqpasynyń 63 jaǵdaıy rastaldy. Olardyń ishinde 2 adam statsıonarlyq em qabyldap jatyr. 48 adam aýrýhanadan jazylyp shyqty. Jyl basynan beri 13 adam qaza bolǵan.
