Balanyń tanymyn qalyptastyratyn mýltfılmderdiń bári qazaq tilinde bolýy tıis – Elızaveta Sedysheva

NUR-SULTAN. QazAqparat – Kınoteatrlardyń jáne barlyq telearnalardaǵy balalar mýltfılmderiniń tilin qazaqshaǵa kóshiretin ýaqyt jetti. Bul týraly «Uly dalanyń ultaralyq tili» respýblıkalyq forýmynda elordadaǵy «Beregınıa» orys etnomádenı ortalyǵy» qoǵamdyq birlestiginiń múshesi Elızaveta Sedysheva aıtty, dep habarlaıdy QazAqparat tilshisi.

«Men taǵdyrdyń jazýymen Temirtaý qalasyndaǵy balalar úıinde tárbıelenip, qazaqtyń tilimen qatar, kórkem dástúrine qanyp óstim. Árkez qasymnan tabylatyn dostarymdy da qazaq ortasynan taptym. Dostarym qazaq bolǵan soń únemi sózdik qorymdy baıytyp, bilim kókjıegin keńeıtýge tyrysamyn. Osy jerde týyp, osy eldiń azamaty bolǵandyqtan, tildi bilmeý – men úshin ardyń isi. QR Prezıdenti qazaq tili ultaralyq qatynas tiline aınalýy kerektigin jıi aıtady. Tildi damytý árqaısysymyzdyń tikeleı mindetimiz. Til – eń aldymen halqymyzdyń tarıhynyń, mádenıetiniń aınasy. Al, memleketimizge qyzmet etetin azamattar osy qundylyǵymyzdy qasterlese – elimiz ary qaraı qaryshtap damı túsetini sózsiz», - deıdi Elızaveta Sedysheva.

Ol memlekettik tildiń ımıdjin arttyrý maqsatynda jastar arasynda qazaqsha sóıleýge shaqyratyn pikir alańdaryn, osyndaı forýmdar, túrli aktsııalar jıi uıymdastyrylsa degen tilegin aıtty.

«Kınoteatrlardyń jáne barlyq telearnalardaǵy balalar mýltfılmderdiń tilin qazaqshaǵa kóshiretin ýaqyt jetti. Qazir ata-analardyń jumysbastylyǵyna baılanysty balalardy mýltfılmder tárbıeleıtin boldy. Eshkim úıretpese de balabaqsha búldirshinderi orys, aǵylshyn tilderin meńgerip alady. Kerisinshe óz ana-tiline kelgende sóıleı almaıdy, sebebi olardyń qazaqsha tanym-túsinigin qalyptastyratyn orta joq, adam joq, ata-ana , ata-áje joq. Bizdiń bolashaq balalarymyzdyń tili qazaqsha shyǵýy tıis. Sondyqtan eń aldymen teledıdar tilin memlekettik tilge 100 paıyz kóshirýimiz kerek dep esepteımin», - deıdi ol.