Balamaly energııa kózderinen óndiriletin qýat quny qashan tómendeıtini belgili boldy

ASTANA. QazAqparat - 2020-2025 jyldardan keıin jańaratyn kózderden óndiriletin elektr energııasynyń ózindik quny dástúrli energııa kózderimen teńesedi. Búgin Parlament Senatynyń jalpy otyrysynda «Parıj kelisimin ratıfıkatsııalaý týraly» zań jobasyn talqylaý barysynda QR Energetıka mınıstri Qanat Bozymbaev osylaı aıtty, dep habarlaıdy QazAqparat.

«Qazirgi kezde Qazaqstannyń jalpy generatsııasynda jańaratyn energııa kózderiniń úlesi 0,9 paıyzdy ǵana qurap otyr. Osy rette alǵashynda jarty paıyzdan bastaǵanymyzdy eske salǵan jón. Bıylǵy toǵyz aıdyń qorytyndysy boıynsha jańaratyn kózdermen energııa óndirýdiń ósimi 177 paıyzdy qurady. Búginde Qazaqstanda jalpy qýaty 258 megavattyq jańaratyn energııa kózderiniń 48 nysany jumys isteýde. 2015 jyly jıyntyq qýaty 120 megavattyq 14 joba iske asyrylǵan edi. Bıyl Almaty, Aqtóbe jáne basqada óńirlerde toǵyzdan astam nysan iske qosylady. Búginde 57 energııa óndiretin uıymdarymen jáne KEGOK kompanııasynyń eseptik-qarjylyq ortalyǵymen kelisimder bekitilip, osy nysandar qazirgi kezde túrli daıarlyq kezeńinde tur. Eger de bul nysandar paıdalanýǵa berilgen jaǵdaıda, 1 606 megavatt qamtylady. Osy rette biz 2020 jylǵa qaraı qoıylǵan maqsatty erte oryndaımyz»,-dediQ. Bozymbaev.

Mınıstr jańaratyn energııa kózderi elimizge qajet ekenin, alaıda qazirgi kezeńde onyń quny qymbat ekenin atap ótti. Bul baǵyttaǵy jumystar kezeń-kezeńmen iske asyrylatyn bolady.

«2020-2025 jyldardan keıin jańaratyn energııa kózderi nysandarynda elektr energııasyn óndirý aıtarlyqtaı arzandaıdy dep kútilýde. Sonymen qatar onyń ózindik quny dástúrli energııa kózderimen teńesýi yqtımal»,-dedi mınıstr.