«Balama avtobýsty jýǵyzdy»: Tekserý kezinde aqparat rastalmady
AQTÓBE. KAZINFORM - Quqyq qorǵaý organdary men tasymaldaýshy birge tekserý júrgizdi. Nátıjesinde aqparat rastalmady.
«Avtopark» JShS dırektory Aqarys Tileýlesov «balama avtobýstyń edenin jýǵyzdy» degen aqparattan soń tekserý júrgizilgenin, alaıda onyń rastalmaǵanyn aıtyp, málimdeme jasady.
— Іshki tártippen tekserý kezinde eshqandaı jaǵdaı anyqtalmady. Aryzdanýshy quqyq qorǵaý organdaryna shaǵym túsirgen. Quqyq qorǵaý organdaryna qajetti málimetter berildi. «Avtopark» JShS-i 20 jyldan astam ýaqyttan beri qyzmet kórsetip keledi. Kúndelikti nusqaýlyq beriledi. Jasóspirimderdiń jolaqysy bolmaı qalsa, bitse jetkizip, eskertýmen shektelýdi aıtamyz, - dedi «Avtopark» JShS dırektory Aqarys Tileýlesov.
Aıta keteıik, tekserý jumystaryna polıtsııa, tasymaldaýshy kompanııa men Aqtóbe qalalyq turǵyn úı-kommýnaldyq sharýashylyq bólimi qatysty.
— Aqtóbe oblystyq PD kámelet jasqa tolmaǵan balanyń aryzy boıynsha tekserý jumysyn júrgizdi. Tekserý kezinde aqparat rastalmady, - dedi Aqtóbe oblystyq PD baspasóz qyzmeti.
Eske salsaq, aqtóbelik turǵyn jolaqysy bolmaı qalǵan balaǵa avtobýs júrgizýshisiniń edenin jýǵyzǵanyn aıtyp, polıtsııaǵa shaǵym túsirdi.