«Balama avtobýs jýǵyzdy»: Aqtóbelik turǵynnyń aryzy boıynsha tekserý bastaldy

AQTÓBE. KAZINFORM – Aqtóbelik turǵyn balasyna avtobýs edenin jýǵyzǵanyn aıtyp, polıtsııaǵa shaǵym túsirdi. Qazir tekserý júrip jatyr. 

Aqtóbe qalasynyń turǵyny áleýmettik jeli arqyly 27 qańtar kúni balasynyń úıge kesh kelgenin, jolaqysyn tólemegen soń avtobýs júrgizýshisi oǵan edendi jýǵyzǵanyn aıtyp kómek surady. Osy oqıǵadan soń polıtsııaǵa da aryz túsirgen. 

- Polıtsııaǵa aryz tústi. Qazirgi kezde tergeý jumystary júrip jatyr, - dedi oblystyq PD baspasóz qyzmetiniń jetekshisi Erbolat Sarqulov. 

Osy aqparattan soń QR Oqý-aǵartý mınıstrligi Balalardyń quqyqtaryn qorǵaý komıteti mán-jaıdy baqylaýǵa alǵanyn habarlady. 

- Aqtóbede avtobýs júrgizýshisi jolaqysy úshin mektep oqýshysyn eden jýýǵa májbúrlegen oqıǵany úzildi-kesildi aıyptaıdy. Bala quqyqtarynyń mundaı óreskel buzylýyna jol berýge bolmaıdy. Komıtet bul áreketti zańǵa qaıshy dep sanaıdy. Komıtet oqıǵaǵa quqyqtyq baǵa berý úshin Bas prokýratýranyń aralasýyn, sondaı-aq ýaqtyly shara qoldanbaǵan qala ákimshiliginiń áreketsizdigi boıynsha tergeý júrgizýdi talap etedi. Biz kinálilerge qatysty tıisti sharalardy qabyldaýdyń mańyzdylyǵyn atap ótip, qoǵamdyq kólikterde balalardyń quqyqtaryn saqtaýdy qatań baqylaýdy kúsheıtýge shaqyramyz, - dep habarlady QR Oqý-aǵartý mınıstrligi Balalardyń quqyqtaryn qorǵaý komıteti. 

Aıta keteıik, Aqtóbede ata-analar balalaryn mekteptiń májilis zalyna jınap, medıtsınalyq tekserýden ótkizgen ujymnyń áreketin de synǵa aldy. Qazir bul oqıǵa boıynsha da qyzmettik tekserý bastaldy.