Balalardyń úıirme jáne sport sektsııasymen qamtylý deńgeıi qandaı
«Qosymsha bilim berý salasynda barlyq oqýshylarǵa jalpy bilim beretin mektepter bazasynda tegin sportpen shuǵyldanýǵa múmkindik berý boıynsha tıisti sharalar qabyldanyp jatyr. 1 343 000 oqýshy (barlyq bilim alýshylardyń 39,5%) sport túrleri boıynsha 40 myńnan astam sport sektsııasynda shuǵyldanady, onyń ishinde 40 myńǵa jýyq sektsııa tegin. Sport sektsııalaryna degen qyzyǵýshylyqqa qatysty mektep oqýshylary arasynda voleıbolǵa – 7268 sport sektsııasy, shahmat - doıby oıyndaryna – 6618, fýtbolǵa – 6509, ulttyq sport túrlerine - 5478, basketbolǵa - 5326, tennıske - 3175, respýblıka boıynsha kúrestiń barlyq túrlerine 2055 sport sektsııasy tartymdy bolyp tur», - dep atalyp ótken Bilim jáne ǵylym mınıstrligi málimetinde.
Atap aıtqanda, bıyl memlekettik bilim berý tapsyrysy aıasynda 33 737-den astam mektep oqýshysyn úıirme jáne sektsııalyq jumystarmen qamtý kózdelgen. Bul maqsatqa qarajat jergilikti bıýdjetten bólinedi.
Budan basqa, jergilikti atqarýshy organdardyń qaýlylaryna sáıkes, 1 balaǵa memlekettik tapsyrystyń ortasha quny aıqyndalady. Qolda bar aqparat boıynsha qazirgi ýaqytta bir balaǵa memlekettik tapsyrystyń ortasha quny 16 myń teńgeden asady.
Qabyldanyp jatqan sharalar esebinen barlyq bilim alýshylardyń jalpy sanynyń 69,4 paıyzyn qosymsha bilim berýmen qamtý kózdelip otyr.
Qazirgi ýaqytta «Bilimdi ult» Ulttyq jobasy júzege asyrylyp jatqany belgili. Osy joba aıasynda Pavlodar, Almaty, Qaraǵandy, Aqtóbe, Aqmola, Jambyl oblystary men Almaty qalasy boıynsha memlekettik bilim berý tapsyrystary qoldanysqa engizildi. Ózge oblystar men qalalarda atalǵan joba iske asyrylatyn bolady.
«E ń kóp taralǵan úıirmeler kórkem-estetıkalyq , sondaı-aq úshtikke kúres jáne basqa da sport sektsııalary kiredi. Qysqy sport túrleri boıynsha mektep janynan ashylǵan 1958 sektsııa jumysyn jalǵastyryp otyr, kamtylǵan bala sany - 37 995. Mektepter janynda 1 214 768 (34,9%) bilim alýshyny qamtıtyn 75 myńnan astam úıirme bar», - dep atalyp ótken Bilim mınıstrligi aqparatynda.
1 272 qosymsha bilim berý uıymdarynda 9 337 úıirme men sektsııa bar, onyń ishinde tegin úıirmeler men sektsııalar – 6 336, onda 803 027 (23,1 %) bala qamtyldy.
Jergilikti atqarýshy organdardyń aqparaty boıynsha búginde oqýshylar tegin qatysatyn mektep janyndaǵy sport sektsııalary jelisiniń keńeıýi baıqalyp otyr.
Vedomstvo mamandarynyń atap ótýinshe, jańa oqý jylynan bastap dene tárbıesi muǵalimderine sektsııalyq jumysqa qosymsha aqy tóleýge baılanysty jalpy bilim beretin mektepterde sport baǵytyndaǵy jumystyń sapasy jaqsarǵany baıqalady. Mektepterde qosymsha 27 myńnan astam jańa sport sektsııalary ashyldy.
«Mınıstrlik osy baǵyttaǵy jumysty jalǵastyrady, osy maqsatta bilim berý uıymdarynyń sport ınfraqurylymyn damytý jáne jaqsartý boıynsha sharalar qabyldanady. Bilim alýshylardy sportpen 100 paıyz qamtý ári sport sektsııalarynyń qoljetimdiligin qamtamasyz etý maqsatynda barlyq balalarǵa sabaqtan tys sport sabaqtaryn ótkizgeni úshin dene shynyqtyrý muǵalimderine bazalyq laýazymdyq jalaqydan 100% mólsherinde qosymsha aqy engizildi
(«Qazaqstan Respýblıkasynyń keıbir zańnamalyq aktilerine ekonomıkalyq ósýdi qalpyna keltirý máseleleri boıynsha ózgerister men tolyqtyrýlar engizý týraly» Zań ). Bazalyq laýazymdyq jalaqyǵa 19 742-den astam pedagog qosymsha aqy alady. Qazirgi ýaqytta dene tárbıesi pedagogtaryna qosymsha aqy engizý esebinen qosymsha 749 368 balany qamtıtyn 27 224 sport sektsııasy ashyldy», - dep túsindirdi mınıstrlik ókilderi.
Jergilikti atqarýshy organdardyń aqparatyna súıensek, ata-analardyń saýalnamasyna monıtorıng óńirler bólinisinde sporttyń 93 túri aıqyndalǵanyn, olarmen aınalysý balalarǵa qyzyqty ekenin kórsetti. Onyń 83 paıyzy orta bilim berý uıymdarynda jáne mektepten tys uıymdarda júzege asyrylyp jatyr.
Bilim berý júıesinde jyl saıynǵy negizgi sport is-sharalarynyń Kúntizbelik jospary aıasynda ata-analardyń sport sektsııasyn tańdaý qajettiligin qanaǵattandyrý maqsatynda keminde 45 sport túrimen aınalysý jáne damytý úshin jaǵdaılar jasalady.
Ulttyq mektep lıgasyna bilim alýshylardyń múddelerin eskere otyryp, sporttyń 10 túri engizildi (basketbol, 3h3 basketbol, voleıbol, fýtbol, fýtzal, gandbol, ústel tennısi, toǵyzqumalaq, asyq atý, bes asyq, jeńil atletıkalyq kross).
«Qazirgi ýaqytta mektepterdiń 42 myńnan astam sport sektsııasynda 1 mln 343 myń oqýshy (nemese mektep jasyndaǵy balalardyń jalpy sanynyń 39%-y) aınalysady. 2022 jyly ata-analardyń qalaýyn eskere otyryp, mekteptegi sport sektsııalarynyń sanyn 70 myńǵa deıin ulǵaıtý josparlanýda. Sonyń arqasynda 1,765 mln-nan astam (nemese mektep jasyndaǵy balalardyń jalpy sanynyń 50%-y) bala sport sektsııalarymen qamtylady. Bul shara oqýshylardyń súıikti sport túrlerin tolyq (100%) tańdaýyna yqpal etedi», - delingen BǴM málimetinde.
Mekteptegi dene tárbıesiniń sapasyn arttyrý jáne bilim berý uıymdarynda sport sektsııalarynyń qoljetimdiligin qamtamasyz etý boıynsha keshendi sharalar qabyldandy. Qosymsha 27 224 sport sektsııasy ashyldy.
Sonymen qatar, bıyldyń basynan bastap mektep jasyndaǵy balalardyń qajettilikteri men qyzyǵýshylyqtaryn eskere otyryp, jergilikti atqarýshy organdar balalarǵa arnalǵan qosymsha bilim berýge memlekettik tapsyrys pen sport baǵytyndaǵy tapsyrysyn iske asyryp jatyr.
