Balalardy vaktsınalaý qaýipsiz jáne tıimdi – professor
«Biz balalar qoǵamnyń eń mobıldi bóligi ekenin,olardyń eresektermen de, qurdastarymen de baılanys jasaıtynyn, mektepke baratynyn, sondyqtan olardyń ınfektsııanyń tasymaldaýshy ekenin túsinýge tıispiz. Sondyqtan kóptegen elderde balalardy vaktsınalaý týraly sheshim qabyldandy. Eki myńnan astam balaǵa júrgizilgen klınıkalyq zertteýler Pfizer vaktsınasynyń qaýipsiz jáne tıimdi ekenin kórsetti», - dedi Almaz Sharman.
Sonymen qatar, ol barlyq vaktsına ımmýnıtetti ómir boıyn qalyptastyrmaıtynyn, keıbir ınfektsııalardan árbir bes, on jyl saıyn, al tumaý sııaqtylardan jyl saıyn egilý kerektigin eske saldy.
«Revaktsınatsııa degen osy. Keıde «údetkish vaktsına» termıni qoldanylady, ıaǵnı taǵy bir qosymsha. Ýaqyt óte kele vaktsınanyń áseri tómendeıdi, onyń ústine, COVID-19-dyń jańa shtamdary paıda bolady. Qaıta egý jańa koronavırýs ınfektsısynyń barlyq shtamdarynan qorǵaý úshin antıdenelerdiń jetkilikti deńgeıin qalyptastyrýǵa múmkindik beredi. Jaqynda Izraılde keń aýqymdy zertteý júrgizildi, bul vaktsınatsııadan ótkenderdiń barlyq jas toptarynda, ásirese egde jastaǵy adamdarda ımmýndyq jaýap ýaqyt óte kele tómendegenin kórsetti. Sondyqtan ekpe saldyrǵan soń 6 aıdan keıin revaktsınatsııany usynatyn ǵylymı negizdeme bar», - dedi professor.
Onyń aıtýynsha, ǵalymdar kross revaktsınatsııany, ıaǵnı úshinshi vaktsınany basqa preparatpen alýdy usynady, biraq bul mindetti emes.
«Densaýlyq saqtaý mınıstrligi vaktsınalardy aralastyrýdy bir nusqa retinde qarastyrady. Aldynda saldyrǵan ekpemen qaıta vaktsınalanýǵa bolatyndyǵyn eshkim joqqa shyǵarmaıdy. Degenmen, men ózim túrli vaktsınalardy aralastyrý tıimdi bolady dep sanaımyn. Aralastyrý kezinde qandaı da bir qarsy kórsetilimder bolǵan joq», - dedi ǵalym.
