Balalardyń psıhologııalyq qaýipsizdigine basymdyq berilip otyr – Erlan Qalmaqov
ASTANA. KAZINFORM – QR Oqý-aǵartý mınıstrligi balalardyń qaýipsizdigi men psıhologııalyq ál-aýqatyna basa mán berip otyr. Bul týraly Tárbıe jumysy jáne qosymsha bilim berý departamentiniń dırektory Qalmaqov Erlan Bolatuly Ortalyq kommýnıkatsııalar qyzmetinde ótken brıfıng barysynda málimdedi.
BAQ ókilderi tarapynan mektepterde bolǵan bala ólimine qatysty ótkir suraqtar qoıyldy. Sonyń ishinde tárbıe júıesiniń tıimdiligi men «Dosbol Like» jobasynyń shynaıy nátıjesi jaıly máseleler kóterildi.
«Birtutas tárbıe baǵdarlamasy men «Dosbol Like» jobasy naqty nátıje bere alyp jatyr ma?» degen saýalǵa jaýap bergen vedomstvo ókili qazirgi tańda basty nazar psıhologııalyq qoldaýǵa aýdarylǵanyn jetkizdi.
– Bul – óte kúrdeli ári jan aýyrtatyn másele. Mınıstrlik pen bilim berý uıymdary tarapynan birqatar naqty shara qolǵa alyndy. Eń birinshi kezekte oqýshylarǵa psıhologııalyq kómek kórsetý kúsheıtildi. El boıynsha 20 óńirde psıhologııalyq qoldaý ortalyqtary ashyldy. Olar balalar arasyndaǵy ózara qarym-qatynasty nyǵaıtýǵa baǵyttalǵan jumystar júrgizip otyr, - dedi Erlan Qalmaqov.
Sonymen qatar «Dosbol Like» jobasy jaıly da túsinikteme berip, baǵdarlama byltyr 50 mektepte pılottyq rejımde iske qosylǵanyn atap ótti.
– Sarapshylar jobanyń oń áserin kórip keledi. 2025-2026 oqý jylynan bastap ony barlyq mektepte engizý kózdelip otyr. Baǵdarlama tek oqýshy men muǵalim emes, ata-analar arasyndaǵy baılanysty da jaqsartýǵa baǵyttalǵan. Bul jyldam sheshile qoıatyn másele emes. Ýaqyt pen júıeli jumys qajet, - dedi departament basshysy.
Brıfıng barysynda jýrnalıster mekteptegi býllıng taqyrybyn da kóterdi. Osyǵan baılanysty qandaı zertteýler júrgizilgeni týraly suraqqa Erlan Qalmaqov bylaı dep jaýap berdi.
– Bul máselege qatysty «Órken» balalardyń ál-aýqatyn arttyrý ǵylymı-praktıkalyq ortalyǵy jumys isteıdi. Ortalyq mektepterde balalardyń psıhologııalyq jaı-kúıin zerttep, saýalnamalar men basqa da áleýmettik zertteýler júrgizip otyrady. Onyń nátıjeleri boıynsha tıisti usynystar ázirlenedi, - dedi ol.
Buǵan deıin elimizdiń 9 óńirinde mektepte býllıngtiń aldyn alýǵa jáne ony azaıtýǵa baǵyttalǵan otandyq «DosbolLIKE» baǵdarlamasynyń aprobatsııasy sátti aıaqtalǵanyn jazǵanbyz.