Balalardy qaýipti kontentten qorǵaıtyn sım-karta iske qosylady
ASTANA. KAZINFORM – Osy sım-kartanyń kómegimen ata-analar balasynyń qandaı qosymshalardy paıdalanyp júrgenin baqylap, zııandy saıttarǵa qoljetimdilikti shektep, qurylǵy únsiz rejımde bolsa da, balasyna qońyraý shala alady.
— Balalardy qorǵaý — bizdiń basty basymdyqtarymyzdyń biri. Memleket basshysy balalardyń qaýipsizdigin qamtamasyz etý, olardyń quqyqtaryn qorǵaý jáne úılesimdi damýyna qolaıly jaǵdaı jasaý — memlekettik saıasattyń asa mańyzdy baǵyty ekenin atap ótti. Osyǵan baılanysty meniń tapsyrmam boıynsha 2023–2025 jyldarǵa arnalǵan balalardy zorlyq-zombylyqtan qorǵaý, sýıtsıdtiń aldyn alý jáne olardyń quqyqtary men ál-aýqatyn qamtamasyz etý jónindegi Keshendi josparǵa kámeletke tolmaǵandardy ınternettegi destrýktıvti kontenttiń zııandy áserinen qorǵaýǵa baǵyttalǵan usynystar ázirlendi. Qazirgi ýaqytta bul usynystar Úkimettiń qaraýynda, — dep jazdy Bas prokýror Berik Asylov «H» áleýmettik jelisindegi paraqshasynda.
Bas prokýror bul sharalardy júzege asyrýǵa kiriskenderin aıtty.
— Biz óz tarapymyzdan bul sharalardy júzege asyrýǵa kiristik. Máselen, Almaty qalasynda prokýratýra TELE2/ALTEL baılanys operatorymen birigip, «SIM KIDS» atty pılottyq jobany iske qosty. Bul — sýıtsıdti nasıhattaý, pornografııa, esirtki, onlaın-kazıno jáne ózge de ınternet qaterlerden qorǵaıtyn arnaıy balalarǵa arnalǵan sım-karta. Osy sım-kartanyń kómegimen ata-analar balasynyń qandaı qosymshalardy paıdalanyp júrgenin baqylap, zııandy saıttarǵa qoljetimdilikti shektep, qurylǵy únsiz rejımde bolsa da, balasyna qońyraý shala alady, — dedi Berik Asylov.
Synaq kezeńi aıaqtalǵannan keıin bul sım-karta barshaǵa qoljetimdi bolady
— Joba ata-analar arasynda úlken qyzyǵýshylyq týdyrdy. Synaq kezeńi aıaqtalǵannan keıin bul sım-karta barshaǵa qoljetimdi bolady. Balalarǵa qaýipsiz orta qalyptastyrý jumysy aldyn ala júrgizilýi tıis. Bala tsıfrlyq keńistikte sýıtsıdke ıtermeleıtin qaýipti oıyndardan, qumar oıyndarǵa táýeldilikten, sondaı-aq psıhıkasyna zııan keltiretin jáne otbasylyq tárbıe men qundylyqtarǵa degen kózqarasyn burmalaýy múmkin kez kelgen jaǵymsyz kontentten qorǵalýy tıis. Eń bastysy — balanyń qaýipsizdigi otbasyndaǵy kóńil bólýden bastalady. Eresekter balalardyń kóńil kúıindegi, ortasyndaǵy jáne qyzyǵýshylyqtaryndaǵy ózgeristerge sezimtal bolǵany jón, — dedi ol.
Balalardy tsıfrlyq keńistikte qorǵaý — «SIM KIDS» jobasynyń alǵashqy qadamy
— Berik Asylov (@Asylov_GenPr) April 19, 2025
Balalardy qorǵaý — bizdiń basty basymdyqtarymyzdyń biri. Memleket basshysy balalardyń qaýipsizdigin qamtamasyz etý, olardyń quqyqtaryn qorǵaý jáne úılesimdi damýyna qolaıly jaǵdaı jasaý — memlekettik…
Aıta ketelik Bas prokýror Berik Asylov elimizde jol apaty kóbeıgenin aıtqan edi.