Balalar men júkti áıelder arasynda koronavırýs juqtyrǵandar kóbeıdi - ınfektsıonıst
«Aqtóbe» telarnasynyń «Jelide 103» baǵdarlamasynda koronavırýs ınfektsııasymen kúres jumystary, vaktsınatsııa jáne revaktsınatsııa týraly aıtyldy. Aqtóbe oblysynyń bas ınfektsıonıst dárigeri Meırambek Qurmanǵazınniń habarlaýynsha, óńirde dáriger kómegine júgingen adam sany artyp keledi.
«Qańtar aıynyń basynda onǵa jýyq adam aýyryp, aýrýhanada jatty. Búginde bir táýlikte 586 adamnyń PTR synamasy oń nátıje kórsetti. Kún ótken saıyn ósim tirkelip jatyr. Bul mýtatsııaǵa túsken vırýstyń keń taralǵanyn kórsetedi. Buǵan deıin 7-14 kúnde aýrý belgisi anyqtalsa, búginde 3-4 kún jetkilikti bolyp tur. Tipti birneshe saǵattan soń da anyqtalady. Orta eseppen 3-6 esege tez tarap jatqanyn kóremiz. Aýrý belgisi de ózgerdi. Ókpe emes, joǵary tynys alý joldary zaqymdanady. Mysalǵa tamaq aýyrady. JRVI belgileri kórinedi. Aldanyp qalýymyz múmkin. Tek 4-5 kúnnen soń ókipeni zaqymdanap ta jatady. Buryn bir apta bolatyn. Bul kórsetkish az, degenmen kezdesip jatyr», - dedi Aqtóbe oblysynyń bas ınfektsıonıst dárigeri Meırambek Qurmanǵazın. Onyń aıtýynsha, boıdy álsizdik bılep, bulshyqettiń syrqyrýy, bas aýrýy da kezdesedi. Vırýstyń osy belgileri anyqtalǵan kezde emhanadan dárigerlerdi úıge shaqyrý kerek.
«Taǵy bir ereksheligi – balalar arasynda taralýy. Qazir Aqtóbede bólek statsıonar ashylyp, balalar em qabyldap jatyr. Júkti áıelderden de anyqtalady. Buryn 4-5 áıel aýrýhanada jatsa, qazir 70-ke jýyqtady. Al 200-den astamy emhana dárigerleriniń baqylaýynda. Eń bastysy - naýqastyń 5-6 kún oqshaýlanýy mańyzdy. Sol kezde taralmaıdy. Tipti aýrýhanadan sol 5-6 kúnde shyǵaryp jatyrmyz», - dedi Meırambek Qurmanǵazın.