Balalar avıabıletin sýbsıdııalaý: Bıyl 2 myń bala qamtylady

ASTANA. QazAqparat – Mádenıet jáne sport mınıstri Ashat Oralov Úkimet otyrysynda bıyl Kids Go Free baǵdarlamasynyń ıgiligin kóretin balalardyń sany artatynyn málim etti, dep habarlaıdy QazAqparat tilshisi.

«Erekshe qajettilikteri bar balalarǵa aıryqsha kóńil bólinedi, osy baǵytta «Children Paralympic Games 2023» ınklıýzıvti sport festıvali ótkiziledi. Oǵan elimizdiń barlyq óńirinen 6-15 jas aralyǵyndaǵy «erekshe» balalar qatysady, «Inklıýzıvti horeografııa» úıirmesiniń tárbıelenýshileri arasynda bı baıqaýy ótedi.

«Salamatty bolashaq» áleýmettik jobasy aıasynda «Teń múmkindikter álemi» qoǵamdyq qorymen birlesip tegin beıimdelgen sport sektsııalary uıymdastyrylady», - dedi ol.

Mınıstrdiń aıtýynsha, vedomstvo muryndyq bolatyn sporttyq is-shara men jobalardyń bári balalar úshin tegin bolady.

«Balalar saıahatyna qatysty jobalardy qoldaý erekshe basymdyqqa ıe. Máselen, oqýshylar arasyndaǵy joǵary suranys pen ózektilikti eskere otyryp, tarıhı-mádenı jáne týrıstik obektilerge barý boıynsha «Jandy sabaqtar» jobasyn transformatsııalaý josparlanýda. Elimizdiń barlyq óńirinde balalar aýdıtorııasyna baǵyttalǵan týrıstik ónimder jelisi keńeıtiledi.

Jalpy balalarmen qolaıly otbasylyq demalysty yntalandyrý úshin mınıstrlik ótken jyldan bastap týrpaket quramynda balalar avıabıletin sýbsıdııalaý baǵdarlamasyn (Kids Go Free Frı) iske asyrýda.

Baǵdarlama negizinde birinshi jyldyń qorytyndysy boıynsha týrpaket quramynda 1 500 bala tegin ushty. Bıyl osy baǵdarlamany iske asyrýdy jalǵastyramyz, 2 myńnan astam bala qamtylady dep kútilýde», - dedi Ashat Oralov.