Balalar aýrýhanalarynyń bıýdjeti basqalarmen salystyrǵanda áldeqaıda az - Ashat Aımaǵambetov
«Balalar aýrýhanalarynyń bıýdjetten alatyn qarajaty basqa aýrýhanalarmen salystyrǵanda áldeqaıda az, bul óz kezeginde sapaly emdeý sharalaryn atqarý úshin aıtarlyqtaı qıyndyq týdyryp jatyr.
Qaraǵandy oblystyq balalar aýrýhanasyna barǵanda osy júıeli problemalardy dárigerlerdiń ózderi aıtyp otyr.
Basty máselelerdiń qatarynda balalardy emdeý úshin bıýdjetten bólinetin tarıf mólsheriniń tómendigi (mańyzdy baǵyttar boıynsha) jáne aýrýhana ǵımarattarynyń kommýnaldyq shyǵyndaryn tóleýge qatysty aspektiler bar.
Naqty aıtatyn bolsaq, bul jerde tarıf degenimiz – memlekettik bıýdjetten jan basyna shaqqanda, ıaǵnı ár emdelgen bala úshin aýrýhanaǵa bólinetin aqsha. Al bólinetin aqsha qandaı bolsa, sapa da sondaı bolady», - dep jazady depýtat.
Ol urpaq saýlyǵy men balalar densaýlyǵy úshin jumsalatyn qarajatty únemdeýge bolmaıtyndyǵyn alǵa tartady.
«Ásirese, KZG-si aıtarlyqtaı tómen baǵyttar boıynsha qaıta qaraý kerek dep aıtyp otyr (pýlmonologııa, nefrologııa, gastroenterologııa, allergologııa, nevrologııa, gematologııa, endokrınologııa). Bólinetin qarjy (tarıf) qaıta zerdelenip, ulǵaıtylýy tıis dep sanaımyn. Bul másele boıynsha Densaýlyq saqtaý mınıstrligimen birge jumys isteımiz. Al, kommýnaldyq shyǵyndar máselesin sheshý úshin oblystyq ákimdik durys ári tıimdi sheshim qabyldap, endi iske asyryp jatyr.
Bizdiń negizgi usynysymyz – kommýnaldyq shyǵyndardy bıýdjetten tólenetin jan basyna qarjylandyrý tarıfinen bólek shyǵaryp, jeke qarjylandyrý. Óıtkeni, ár óńirde kommýnaldyq tarıf ártúrli jáne osyǵan baılanysty aýrýhanalar úshin qoldanystaǵy qarjylandyrý júıesi tıimsiz. Bul másele boıynsha tıisti jumys atqarylady», - deıdi Ashat Aımaǵambetov.
