Balalar arasyndaǵy quqyqtyq saýattylyqty arttyrý mańyzdy qadam - Marat Bashımov

ALMATY. QazAqparat – Tanymal saıasattanýshy, Eýropalyq quqyq pen adam quqyǵy saraptamalyq ınstıtýtynyń dırektory Marat Bashımov respýblıka mektepterindegi qaýipsizdikti qamtamasyz etýge qatysty pikirin bildirdi, dep habarlaıdy QazAqparat tilshisi.

Sarapshy Prezıdent Qasym-Jomart Toqaev bul máseleni birneshe ret kótergenin atap ótti.

«Búgin Úkimet otyrysynda bilim mınıstri balalardyń qaýipsizdigine qatysty qolǵa alynǵan negizgi jumystardy atady. Bul máseleni Memleket basshysy da birneshe ret kóterdi. Sheshimderge sáıkes, balalardy qorǵaýǵa barlyq sala atsalysýy tıis. Bul jerde mınıstr balalardyń quqyqtaryn fızıkalyq turǵydan qorǵaý týraly aıtty. Qazan qalasyndaǵy tragedııa qaıtalanbaýy kerek. Fızıkalyq nemese psıhologııalyq qorǵanys ol mańyzdy emes, eń bastysy qaýipiń aldyn alý shart. Búginde barlyq qazaqstandyq mektepter balalardyń qaýipsizdigin qamtamasyz etýge daıyn emes ekenin moıyndaý kerek. Áli kúnge deıin qylmys kóp tirkeletin óńirler bar. Tehnıkalyq máseleler sheshilmegen. Sondyqtan myna alasapyran zamanda balalardyń qaýipsizdigin baqylaý óte qajet», - dedi Marat Bashımov.

Onyń pikirinshe, balalardyń quqyqtyq saýattylyǵyn arttyrý jumystaryn uıymdastyrý mańyzdy.

«Aqparattyq ǵasyrda kámeletke tolmaǵandardy jeke tulǵa etip qalyptastyrýda ata-anadan basqa qoǵam men memleket belgili bir ról atqarady. Sebebi balalar olardy kóbirek tyńdaıdy jáne qabyldaıdy. Qalaı isteý kerek, qaıda barý qajet, kimge júgingen durys sol sııaqty. Biz bilim berý júıesinde qaýipsizdikti qamtamasyz etý úshin bar kúsh-jigerimizdi salýymyz kerek dep sanaımyn. Bul barlyq jerge beınekameralardy qoıýmen ǵana shektelmeýi tıis. Sonymen qatar, bizdiń balalar tárbıesine barynsha den qoıýymyz mańyzdy. Bul mektepke deıingi, orta jáne joǵary bilim alýdyń barlyq kezeńin qamtıdy.

Marat Bashımov Ulttyq qoǵamdyq senim keńesiniń alańynda Prezıdent adam quqyǵyn qorǵaý salasynda birinshi kezekte turǵan halyqaralyq standarttardy engizý týraly únemi aıtatynyn tilge tıek etti. Onda balalardy qorǵaý birinshi orynǵa shyǵady.

«Bizde jaqyn arada júzege asyrylatyn keshendi jospar bar. Onda balalardy qorǵaý birinshi kezekte tur. Sebebi biz BUU-nyń alty negizgi konventsııalarynyń ishinen balalar quqyǵy týraly konventsııaǵa qol qoıdyq. Sonymen qatar, Memleket basshysynyń adam quqyǵy kórsetkishterin teńestirý týraly talaby mańyzdy. Kórsetkishterdiń birinshisi - kámeletke tolmaǵandardyń qaýipsizdi», - dep atap ótti spıker.

Eske salaıyq, búgin Úkimet otyrysynda QR Premer-Mınıstri Asqar Mamın 10 shildege deıin «Bilim berý uıymdarynda balalardyń qaýipsizdigin qamtamasyz etý jónindegi jol kartasyn» bekitýdi tapsyrdy.