Balaǵa zorlyq-zombylyq kórsetilse balabaqsha lıtsenzııasynan aıyryla ma

NUR-SULTAN. QazAqparat – Búldirshinge balabaqsha qabyrǵasynda qandaı da bir zorlyq-zombylyq kórsetilse, onda ol uıym lıtsenzııasynan aıyryla ma? Bul suraqqa Mektepke deıingi bilim berý komıtetiniń tóraǵasy Gúlmıra Kárimova jaýap berdi, dep habarlaıdy QazAqparat tilshisi.

Onyń aıtýynsha, lıtsenzııalaý – balabaqshalardy jabý maqsatynda jasalyp jatqan shara emes. Ol mektepke deıingi bilim beretin mekemelerdiń sapasyn arttyrýǵa, olardy baǵyttaýǵa arnalǵan.

«Balalardy uryp-soǵý jaǵdaılary oryn alsa, ol jeke qaralady. Árıne, barlyq jaǵdaı birdeı emes. Eń bastysy – bilim berý uıymy óz jumysyn standartqa saı júrgizýi tıis. Eger osy talaptar oryndalsa, eshqandaı suraq týyndamaıdy. Bekitilgen normatıvtik tártipter buzylǵan jaǵdaı dáleldengen kezde zańǵa sáıkes tekserý júrgiziledi. Qazirgi tańda balabaqshalarǵa 3 múmkindik beriledi. Osy úsh múmkindikti paıdalanyp, jaǵdaıyn durystamasa, onda lıtsenzııadan aıyrý týraly suraq týyndaıdy», - dep atap ótti Gúlmıra Kárimova.

Budan ózge, komıtet tóraǵasy lıtsenzııa talaptary men biliktilik erejeleri áli bekitilmegenin jetkizdi. Onyń aıtýynsha, normatıvtik qujat sarapshylar, balabaqsha basshylary jáne jaýapty vedomsvo ókilderimen aqyldasa otyryp daıyndalady.

Gúlmıra Kárimova buǵan deıin baqshalardy lıtsenzııalaý kezine sybaılas jemqorlyq deńgeıi tómendeıtinin málimdegen bolatyn.