Balaǵa qatysty býllıng derekteri boıynsha jaýapty organdar qalaı áreket etedi
«Bıylǵy 3 mamyrda «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» Zań qabyldandy. Onda balalar arasyndaǵy álimjettikpen, býllıngpen kúres uǵymy bekitildi. Oqý-aǵartý mınıstrligi balany qorlaýǵa nemese qorqytýǵa (býllıng) jol bermeý baǵytynda tıisti qaǵıdalardy ázirleý jáne bekitý jónindegi ýákiletti organ sanalady. Budan basqa, «Buqaralyq aqparat quraldary týraly» Zań 18-4-bappen «Balaǵa qatysty ınternet-resýrstarda kıberbýllıng faktilerin qaraý máseleleri jónindegi ótinishter» dep tolyqtyryldy. Osy bapqa sáıkes azamat nemese balanyń zańdy ókili balaǵa qatysty kıberbýllıng faktileri anyqtalǵan jaǵdaıda, quqyqqa qarsy áreketter jasalatyn ınternet-resýrstyń ataýyn kórsete otyryp, balaǵa qatysty jasalatyn kıberbýllıng faktileri týraly ótinishpen ýákiletti organǵa jazbasha túrde nemese elektrondyq qujat nysanynda júginýge quqyly», - delingen Іshki ister mınıstrliginiń «QazAqparat» agenttigine bergen jaýabynda.
Atap aıtqanda, saraptama toby balaǵa qatysty kıberbýllıng faktileri boıynsha ótinishti kelip túsken kúnnen bastap úsh jumys kúni ishinde qaraıdy. Saraptama tobyn qurý, sondaı-aq balaǵa qatysty kıberbýllıng faktileri boıynsha ótinishti qaraý tártibin Aqparat jáne qoǵamdyq damý mınıstrliginiń ýákiletti organy aıqyndaıdy.
«Óz tarapynan polıtsııa organdary býllıngtiń árbir faktisin ákimshilik nemese qylmystyq quqyq buzýshylyq quramynyń bar-joǵyna tekseredi, onyń nátıjeleri boıynsha sheshim qabyldaıdy. Kámeletke tolmaǵandardyń quqyqtyq saýattylyq deńgeıin arttyrý maqsatynda polıtsııa qyzmetkerleri bilim berý uıymdarynda dáris oqıdy, sondaı-aq ákimshilik jáne qylmystyq zańnama normalaryn túsindiredi. Barlyq mektepte dırektorlardyń tárbıe jónindegi orynbasarlary, áleýmettik pedagogtar men pedagog-psıhologtar shtattyq laýazymdar engizilgenin habarlaımyz. Jekelegen óńirlerdegi bilim berý uıymdarynda quqyq buzýǵa jol bermeý boıynsha shtattyq laýazymdardy engizýdiń oń nátıjeleri bar», - dep atalyp ótken mınıstrlik málimetinde.
Budan basqa, bilim berý mekemeleri beınebaqylaý júıelerimen, dabyl júıesimen, lıtsenzııalanǵan jeke kúzetpen, kirýdi baqylaý jáne basqarý júıelerimen jaraqtandyrylyp jatyr.
Budan buryn habarlanǵandaı, bilim berý uıymdarynda zorlyq-zombylyqtyń aldyn alý jónindegi vedomstvoaralyq baǵdarlama engiziledi.
UNESCO baıandamasyna qaraǵanda, álem mektepterindegi árbir úshinshi oqýshy býllıngke tap bolady.
