Balabaqshalardy lıtsenzııalaý - balalardy zorlyq-zombylyqtan qorǵaýdyń kepili - ÚEU ókilderi
Olar muny qajetti shara sanaıdy. Sebebi ol balalardy mektepke deıingi uıymdardaǵy zorlyq-zombylyqtan qorǵap, balabaqsha tárbıelenýshilerine jaıly jáne qaýipsiz jaǵdaı jasaýǵa múmkindik beredi. Bul týraly búgin Nur-Sultanda ótken brıfıngte jekemenshik mektepke deıingi uıymdardyń ıeleri málimdedi.
«Balalardy qorlaý men zorlyq-zombylyqtyń óreskel oqıǵalary bizge sabaq bolýy kerek. Balalarymyzdyń jastaıynan zorlyq-zombylyqqa, psıhologııalyq soqqyǵa ushyraýyna jol bermeýimiz kerek. Buǵan zań júzinde núkte qoıatyn kez keldi. Lıtsenzııa berý jekemenshik jáne memlekettik balabaqshalardyń tolyq sáıkestigin tekserýge kómektesedi», - dedi «Ádilet» jekemenshik mektepke deıingi uıymdar qaýymdastyǵynyń jetekshisi Dınara Qudaıqulova.
«Lıtsenzııa berýdi qoldaımyz. Bul bizdiń ustanymymyz. Lıtsenzııa berý – ol álemdik tájirıbe. Bıznesti júrgizý úshin qajetti talaptardy eskere otyryp, balabaqshalardyń qyzmetine lıtsenzııa júrgizý qajet. Ýaqyt balalardyń qarapaıym bilimdi de almaı otyrǵanyn kórsetip otyr. Biz bıznestiń zańdy túrde júrgizilgenin qoldaımyz. Sondaı-aq bul menshik nysanyna qaramastan bilim berýdiń barlyq deńgeıine qatysty bolýy kerek. Eger balabaqshalar eń tómengi talaptardy oryndamasa, olardy ashýǵa tyıym salý qajet», - dedi «Jekemenshik bilim berý uıymdarynyń respýblıkalyq qaýymdastyǵy» ZTB jetekshisi Roza Sadyqova.
«Bilim Invest» Ulttyq bilim berý ınvestorlary qaýymdastyǵynyń prezıdenti Kúlánda Batyrbekova da lıtsenzııa berý balabaqshalar qyzmetinde tártipti qalpyna keltirýdiń tıimdi quraly ekenin atap ótti.
«Bilim Invest» Ulttyq respýblıkalyq qaýymdastyǵy 538-den astam balabaqsha men 17 mektepti qamtıdy. Ózim birneshe balabaqshanyń quryltaıshysymyn. Almaty oblysynda 802 jekemenshik balabaqsha bar, olardyń barlyǵy jaqsy jumys istep jatqanyna kúmánim bar. Keıbir jekemenshik balabaqshalardyń jaldamaly kottedjderde jumys isteıtinin kórip otyrmyz, olarda balalardyń qaýipsiz turýy úshin eń tómengi jaǵdaılar da joq. Osydan qanshama bala zardap shegedi. Áleýmettik jelilerde tárbıeshilerdiń balalarǵa qol kótergen vıdeosyn kórip shoshydyq. Balabaqshalarǵa lıtsenzııa berýdi engizý kerek, bul ýaqyt talaby», - dedi «Bilim Invest» bilim berý ınvestorlary ulttyq qaýymdastyǵynyń prezıdenti Kúlánda Batyrbekova.
«Biz erekshe balalardyń ata-analarynyń múddesin qorǵaımyz. Men ózim erekshe balanyń anasymyn, sondyqtan kóp máseleni syrttaı bilemin. Keıbir erekshe bilim berýdi qajet etetin balalar sóılespeıdi, estimeıdi, bireýdiń aqyl-oıy kemistigi bar, sol sebepti balalarymyz úshin alańdaımyz. Barshańyzdy parasatty, sanaly bolýǵa shaqyrǵymyz keledi. Lıtsenzııa berý - bul eń aldymen mektepke deıingi bilim berý salasynda sapaly qyzmet kórsetý, bul bilikti qyzmetkerlerdiń, tárbıeshilerdiń quramy, bul tıisti úı-jaılar. Balabaqshalar jertólelerde, turǵyn úılerdiń bıik qabattarynda bolmaýy kerek. Jeke oıyn alańdary bolýy kerek. Bul qaýipsizdikti qamtamasyz etedi. Biz lıtsenzııa berý balabaqshalardaǵy búldirshinderdiń qaýipsizdigin qamtamasyz etýge jáne mektepke deıingi bilim berý sapasyn arttyrýǵa septigin tıgizedi dep esepteımiz», - dedi «Qazaqstannyń erekshe balalary» respýblıkalyq qoǵamdyq birlestiginiń basqarma tóraǵasy Raýana Saǵadıeva.