Balabaqshada ata-analardan aqsha jınaý qanshalyqty zańdy
ShQO bilim basqarmasynyń málimetine súıensek, óńirde 2-den 6 jasqa deıingi balalardy mektepke deıingi tárbıemen qamtý kórsetkishi - 97,8%.
Balabaqshadaǵy kezekti joıý maqsatynda arnaıy ázirlengen josparǵa sáıkes 2025 jylǵa deıin 2875 jańa oryn ashý josparlanǵan.
Búgingi tańda balabaqsha kezeginde 2-3 jastaǵy 1675 bala tur. Al aımaqtyń eki aýdany Katonqaraǵaı jáne Samarda oryn tapshylyǵy joq.
«Ótken jyly oblystaǵy balabaqshalarda 1080 jańa oryn ashyldy. Bıyl Óskemende 5 balabaqsha salynyp, 880 oryndyq burynǵy 5 balabaqsha ǵımaraty nysanaly maqsatqa qaıtarylady. Sondaı-aq jumys istep turǵan balabaqshalardy 300 orynǵa keńeıtý josparlanýda. Onyń ishinde Zaısan aýdanynda 125 orynǵa, Rıdder qalasynda, Altaı, Glýbokoe, Kúrshim, Tarbaǵataı, Ulan, Shemonaıha aýdandarynda 25 orynǵa arttyrylady», - deıdi basqarma basshysy Inessa Chernysheva.
Osy rette ol ata-analar jıi qoıatyn «balabaqshalardyń ártúrli qajettilikterine qarajat jınaý qanshalyqty zańdy?» degen saýalǵa jaýap berdi.
«Mektepke deıingi memlekettik jáne jeke menshik uıymdardy qarjylandyrý, mektepke deıingi tárbıe men oqytýdy, orta bilim berýdi, sondaı-aq tehnıkalyq jáne kásiptik, orta bilimnen keıingi, joǵary jáne joǵary oqý ornynan keıingi bilim berýdi jan basyna shaqqandaǵy normatıvtik qarjylandyrý qaǵıdalaryn bekitý týraly» QR Bilim jáne ǵylym mınıstriniń 2017 jylǵy 27 qarashadaǵy № 596 buıryǵyna sáıkes, oqytýdyń kredıttik tehnologııasyn eskere otyryp júrgiziledi. Qarjylandyrýdyń jan basyna shaqqandaǵy normatıvinde uıymdy ustaýǵa jumsalatyn barlyq shyǵystar kózdelgen. Osylaısha, memlekettik uıymdarda materıaldyq-tehnıkalyq jaraqtandyrý jergilikti bıýdjet qarajaty esebinen júrgiziledi. Sondyqtan mundaı balabaqshalarda ata-analardan aqsha jınalmaýy tıis. Al jeke uıymdarda qarjylandyrý quryltaıshynyń qarajaty esebinen júzege asyrylady jáne eger shartta erikti demeýshilik kómek týraly tarmaq bolsa, onda osy maqsattar úshin ata-analardyń qarajatyn tartýǵa bolady», - dep túsindirdi I.Chernysheva.
