Bala asyrap alǵysy keletinderge talaptar kúsheıtilmek
ASTANA. KAZINFORM — QR Oqý-aǵartý mınıstrligi bala asyrap alǵysy keletin úmitkerlerge qoıylatyn talaptardy kúsheıtetin tetikterdi engizbek.
- 2024 jylǵy 23 shildede QR Konstıtýtsııalyq soty «Neke jáne otbasy týraly» kodekstiń 91-baby 2-tarmaǵynyń 11) tarmaqshasyn Konstıtýtsııaǵa sáıkes emes dep tanydy. Bul bapta tirkelgen nekede turmaǵan (erli-zaıypty bolmaǵan) erlerge bala asyrap alýǵa tyıym salynǵan edi. Bul rette, jyl saıyn balalarǵa qatysty quqyq buzý derekteri kóbeıip keledi. Bas prokýratýranyń Quqyqtyq statıstıka jáne arnaıy esepke alý jónindegi komıtetiniń málimetinshe, mundaı quqyq buzý áreketteriniń 99 paıyzyn er adamdar jasaıdy. Joǵaryda aıtylǵandardy eskere otyryp, mınıstrlik erli-zaıyptylarǵa bala asyrap alýǵa basymdyq quqyǵyn berý máselesin qarastyryp jatyr ma?, - dep surady senator Nýrııa Nııazova.
Óz kezeginde Oqý-aǵartý vıtse-mınıstri Edil Ospan Konstıtýtsııalyq sottyń normatıvtik qaýlysyn iske asyrý aıasynda mınıstrlik jetim balalar men ata-anasynyń qamqorlyǵynsyz qalǵan balalardy tárbıeleýde erli-zaıyptylardyń basymdyǵyn kózdeıtin birqatar zańnamalyq normalardy ázirlegenin aıtty.
- Sondaı-aq úmitkerlerge qoıylatyn talaptardy qataıtý boıynsha sharalar kesheni ázirlendi. Bul turǵyda bala asyrap alýshy men asyraýǵa beriletin balanyń jas aıyrmashylyǵyn anyqtaý, bala asyrap alýshynyń sottylyǵy týraly aqparatty jyl saıyn jańartý, mindetti psıhologııalyq dıagnostıkadan jáne akkredıttelgen uıymdar arqyly tıisti oqytýdan ótý eskerilgen. Qazir bul túzetýler memlekettik organdarmen kelisilip jatyr. Osy rásimderden keıin túzetýler paketi Parlament qaraýyna engizilmek, - dep túsindirdi vıtse-mınıstr.
Budan buryn habarlanǵandaı, bıyl shilde aıynda Konstıtýtsııalyq sot erler men áıelder bala asyrap alǵysy keletinderdiń tiziminde teń dárejede ekenin jarııalady.