Baqytbek Smaǵul: «Aıbyn» áskerı-patrıottyq jıyny jastardyń boıyndaǵy kóp dertke daýa

NUR-SULTAN. QazAqparat - «Aıbyn-2019» respýblıkalyq áskerı-patrıottyq jıyny bir jylmen shektelmaeı, dástúrge aınalyp otyrǵany durys. QR Parlamenti Májilisiniń depýtaty Baqytbek Smaǵul Qaraǵandy oblysynyń «Spassk» oqý-jattyǵý ortalyǵynda ótip jatqan respýblıkalyq áskerı-patrıottyq jıynǵa qatysty osyndaı pikir bildirdi, dep habarlaıdy QazAqparat tilshisi.

Depýtat «Aıbynnyń» bastaýynda Tuńǵysh Prezıdent Nursultan Nazarbaevtyń «Jas sarbaz» sııaqty patrıottyq klýbtar qurý týraly bastamasy turǵanyn aıtady.

«Prezıdent saılaýdan keıin ant qabyldaǵan kezde Qazaqstan Qarýly kúshteriniń aldynda qoshemet kórsetilgenin bilesizder. Bul kez kelgen memlekettiń eldigin bildiretin nyshandy shara. Ótken jyly Elbasy jas sarbazdar birlestigin qurýǵa bastama kótergen bolatyn. Sol bastama boıynsha Qazaqstannyń barlyq jerinde klýbtar quryldy. Ásker - tynyshtyq pen turaqtylyǵymyzdyń kepili», - deıdi Májilis depýtaty.

Sonymen qatar, ol qazir jas jetkinshekterdiń túsiniksiz trendterge qumartyp, áreketteri usaqtalyp bara jatqany týraly syn kóp aıtylatynyn alǵa tartady. Onyń aıtýynsha, búgingi «Aıbyn» áskerı-patrıottyq jıyny sol «dertterge» daýa bolatynyn aıtady.

«Jigitke jigittik sıpat pen rýh beretin ol - armııa. Sondyqtan da búgingi «Aıbynǵa» Joǵarǵy Bas qolbasshynyń barýy keshegi jaýynger retinde meni de jigerlendiredi. Bul sharaǵa Qazaqstannyń barlyq aımaqtarynan patrıottyq klýbtardyń aıbyndy jastary kelgen. Sol jastardyń barlyǵy shyńdalyp, otannyń tutastyǵyna, memleket retinde qaýqarly bolýyna birden-bir jaýapty ózderi ekenin uǵynady. Áýe men teńizde, qurlyq pen taý-tasta bizdiń armııa ózin erkin sezinetindeı qaýqar alyp keledi. Sony biz damyta túsýimiz kerek. Otan aldyndaǵy boryshyn ótegen adam ómirdiń mánin shynaıy túsinedi. Búgingi «Aıbynnan» bastap, mekteptegi alǵashqy áskerı daıyndyq páni, mekteptiń sapynda turý, azamattyq mindetti ózine júkteý, azamattyq boryshty aqtaý, otandy saqtaý, ardy taptap ótpeý, sonyń barlyǵy da Spasskte bolyp jatqan «Aıbynnyń» uranymen úndes», - deıdi halyq qalaýlysy.

Májilis ókili bul jıyn jyl saıyn osy deńgeıinen túspeı, dástúrli ótse degen tilegin de bildirdi.

«Osyndaı sharalardan baryp Otanǵa degen súıispenshilik týady. Qazir otandy qoıyp, ata-anaǵa masyl bolyp jatqandar bar. Al «Aıbynnan» ótken jastar ol jolǵa túspeıdi. «Aıbynǵa» Prezıdenttiń arnaıy barǵanyn, óz kózimen kórgenin salaǵa degen qamqorlyq pen qoldaý dep bilemin. Joǵarǵy qolbasshynyń nemquraıly qaramaýy úlken úmit uıalatady. Aýǵan soǵysy ardagerleriniń qaýymdastyǵy osy «Aıbynnyń» qurylýyna tikeleı atsalysyp, qujattaryn daıyndasqan bolatyn. Bul jıyn bir jylmen shektelmeýi kerek dep oılaımyn. Qazir biz mańaıymyzben dostyq peıilde synaqqa túsip jatyrmyz. Geografııalyq turǵyda tutastyǵy myǵym elimizdi qorǵaıtyn jastardy erte bastan tárbıeleý - túsingen janǵa úlken strategııalyq qadam», - degen depýtat sóziniń sońyn sýyryp salǵan óleńimen túıindedi:

Máńgilik el etem deseń qazaqty

Ózgege emes, ózińe qoı talapty

Áıel - qazyq, erkek - baqan ár úıde

Otbasyna er azamat jaýapty, - deıdi ol.

Eske sala keteıik, 12 maýsymda ótken ulyqtaý rásimi barysynda Qasym-Jomart Toqaev on mańyzdy baǵytyn jarııalaǵan bolatyn.

Foto: old.aikyn.kz