Baqyt Sultanov: Salyqtyq tekserýlerdi 37,5 paıyzǵa qysqartamyz
«2016 jylǵa arnalǵan bıýdjettiń atqarylýy jumys oryndaryn ashý men kásipkerlikti yntalandyrý arqyly ekonomıkany jandandyrýǵa baǵyttalǵan bolatyn. Ekonomıkanyń ósimi 1 paıyzdy qurady. Ol kólik salasynda kórsetiletin qyzmetterdiń kóleminiń ósýi, aýyl sharýashylyǵynda, qurylysta, onyń ishinde turǵyn-úı qurylysynda, ónim shyǵarýdyń ulǵaıýy esebinen qamtamasyz etildi.
Bıýdjettiń kiristeri 7,7 trln. teńgege jetti. Bul 2015 jyldyń kórsetkishterinen 1,5 trln. teńgege kóp. Onyń 30 paıyzy transfertterge keledi. Bıýdjet kiristeriniń áli de bolsa Ulttyq qordan tartylatyn transfertter men álemdik shıkizat naryǵy konıýnktýrasynyń ózgerýine táýeldiligi týraly sizderdiń aıtqan eskertýlerińiz oryndy. Sondyqtan, ekonomıkanyń ósýi men ári qaraı damýy úshin biraz sharalar josparlanyp otyr. Bul jospardyń nátıjeli bolýy úshin biz bızneske qolaıly jaǵdaı jasap, salyq túsimderiniń joǵary qaıtarylymyn saqtap qalýymyz kerek. «Kiris kirmeı - shyǵys shyqpaıdy» degen mátel bar.Bul rette, jumysymyz salyqtyq túsimderdi ulǵaıtý men bızneske ákimshilik qysymdardy azaıtý aıasynda ótedi. Máselen, ústimizdegi jyly salyqtyq tekserýlerdi 37,5 paıyzǵa qysqartamyz. Budan basqa, jańa Salyq kodeksi jobasynda osy tekserýlerge sebep bolatyn negizdemelerdiń 56 paıyzy alynyp tastalady. Sonymen, qazirgi 32 normanyń 14-i ǵana qalatyn bolady»,-dep toqtaldy mınıstr.
Onyń sózine qaraǵanda, jalpy salyqtyq tekserýlerde gorızontaldy monıtorıng engiziledi. Ol senim, ashyqtyq jáne ózara tıimdi prıntsıpteri boıynsha qoldanylady. Salyqtyq ákimshilendirýdegi qyzmetterdi odan ári aqparattandyrý da osy jumysqa oń yqpalyn tıgizedi.
«Qarastyrylyp jatqan mańyzdy máseleniń taǵy biri - ol tıimsiz salyqtyq preferentsııalardyń sanyn qysqartý. Ózderińizge belgili, osy jeńildikter bıznespen kóbinese salyq tóleýdiń mólsherin azaıtý úshin ǵana qoldanylady. Osyǵan baılanysty qosylǵan qun, korporatıvtik tabys salyqtary jáne de jergilikti salyqtar boıynsha qoldanystaǵy jeńildikter qaıtadan qaralady. Budan basqa, Ákimshilik quqyq buzýshylyq kodeksine gýmanızatsııa aıasynda tıisti ózgerister engizilý qarastyrylýda. Onyń eń bastysy - ol ákimshilik aıyppuldyń kólemin qysqartý men jazalaýdyń ornyna eskertý ınstıtýtyn keńinen qoldaný»,-dedi B. Sultanov.