Baqyt Sultanov azyq-túlik qaýipsizdigin saqtaýdyń basty problemalaryn atady
«Azyq-túlik qaýipsizdiginiń qazirgi jaǵdaıy birinshiden ónimdi uzaq merzimge saqtaý úshin sapaly ınfraqurylymnyń jetispeýshiligimen sıpattalady. Bul aýyl sharýashylyq óndirýshiniń shyǵynyn arttyrady. Ekinshiden saýda-logıstıkalyq ınfraqurylym nysandarynyń bir-birimen durys úılestirilmeýi tutynýshyǵa deıin jetkizetin taýar jolyn qıyndatady. Úshinshiden saýda ınfraqurylymynyń eski formattary ónimdi tıimdi taratyp, uzaq merzimge baǵany turaqtandyrýǵa jol bermeıdi. Sonymen birge elimizdegi kólik-logıstıkalyq júıeniń qymbattylyǵy men tıimdiliginiń tómendigi tranzıttik múmkinshilikteri men eksporttyq áleýetti tolyq ashýǵa qosymsha qıyndyqtardy týyndatady», - dedi Baqyt Sultanov Úkimet otyrysynda.
Mınıstrdiń aıtýynsha óndiris pen tutyný úılesimi týraly aıta kele ishki naryqtaǵy suranys otandyq azyq-túlik taýarlary esebinen jabylatyny aıqyn ekenin jetkizdi.
«Alaıda qazirgi ınfraqurylym, jetildirilmegen logıstıka, taýar aınalymyna qatysýshylardyń ózara naqtylanbaǵan is-qımyl baǵanyń edáýir ósýine alyp keledi. Elimizdiń árbir azamaty muny osyndaı jaǵdaıda ásirese maýsymaralyq kezeńde sezinedi. Jyl saıyn aqpannan mamyrǵa deıin, egin qory taýsylyp, kórshi elderden jańa ónim kele bastaǵanda biz baǵanyń joǵary turaqsyzdyǵyn baıqaımyz. Bul óz kezeginde ınflıatsııaǵa teris áser etedi», - dedi ol.
