Bakýde ázerbaıjan tilindegi tsıfrlyq qazaq kitaphanasy tanystyryldy

BAKÝ. QazAqparat – Dıplomatııalyq qarym-qatynastyń ornaǵanyna 30 jyl tolýyna oraı Qazaqstan Elshiligi Fatalı Ahýndov atyndaǵy Ázerbaıjan ulttyq kitaphanasymen birlesip, qazaq qalamgerleri eńbekteriniń ázerbaıjan tilindegi tsıfrlyq kitaphanasynyń tusaýkeserin ótkizdi, dep habarlaıdy QazAqparat.

Іs-sharaǵa Jazýshylar odaǵynyń hatshysy, Ázerbaıjannyń halyq jazýshysy Chıngız Abdýllaev, Túrki mádenıeti men murasy halyqaralyq qorynyń prezıdenti Gıýnaı Efendıeva, «Ázerbaıjan-Qazaqstan» respýblıkalyq dostyq qoǵamynyń prezıdenti Eldar Gıýnaıdyn, Ázerbaıjannyń ádebı toptary men zııaly qaýymynyń kórnekti ókilderi qatysty.

Eki el arasyndaǵy yntymaqtastyqtyń uzaq jyldary ishinde ártúrli ýaqytta ázerbaıjan tiline aýdarylǵan qazaq oıshyldarynyń, jazýshylar men aqyndarynyń baı kitap qory jınalyp, olardyń shyǵarmalary jaqynda elshiliktiń bastamasymen tsıfrlandyryldy.

Olar - Abaıdyń, Jambyl Jabaevtyń, Maǵjan Jumabaevtyń, Muhtar Áýezovtiń, Qalıjan Bekhojınniń, Saparǵalı Begalınniń, Qadyr Myrzalıevtiń, Oljas Súleımenovtiń, Rollan Seısembaevtiń, Muhtar Shahanovtyń, Sábıt Dosanovtyń, Nemat Kelimbetovtiń, Joltaı Jumattyń, Sherhan Murtazanyń, Ǵalym Mutanovtyń, Berik Shahanovtyń, Qazybek Shahanovtyń, Baqytjan Qanapııanovtyń jáne Ulyqbek Esdáýlettiń shyǵarmalary.

Tsıfrlyq kitaphanaǵa Jambyl Jabaevtyń 1939 jylǵy «Laıla» shyǵarmasynan bastap, qazirgi zamanǵy jazýshylardyń eńbekterine deıingi basylymdardyń 50-ge jýyq elektrondyq nusqasy endi.

Tsıfrlanǵan shyǵarmalardyń ishinde Fırýza Agaeva, Fatıma Dýrsýnova, Aıda Eıvazova, Elhan Zala Karahanly, Akıf Ahmedly, Ibragım Ilıasly, Ramız Askerov, Elman Gýlıev, Teımýr Týran, Nızamı Mamedov-Tagısoı, Narıman Abdýlrahmanly jáne basqa da ázerbaıjan aqyn men jazýshy-aýdarmashylardyń tárjimeleri bar.

Óz sózinde Qazaqstan Elshisi Serjan Ábdikárimov osyndaı jobalardy iske asyrý arqyly nyǵaıa beretin baýyrlas eki el men halyqtardyń tarıhı tyǵyz mádenı-gýmanıtarlyq, ádebı jáne adamı baılanystaryn atap ótti.

Aqparattyq keńistikte ashyq tsıfrlyq kitaphanany qurý ony shynymen halyqtyq, barlyǵyna qoljetimdi etedi.

Osy elektrondy resýrs eki túrki halyqtarynyń búgingi jáne bolashaq urpaqtarynyń mádenı ózara baıytylýy men rýhanı jaqyndasýyn kúsheıtetinine senim bildirdi.

Óz kezeginde, kitaphana dırektory Kerım Tahırov qazaq jazýshylarynyń eńbekterin tsıfrlyq formatqa kóshirý jáne olardy bolashaq urpaqqa tapsyrý arqyly saqtaýdyń mańyzdylyǵyn atap ótti. Ol tsıfrlandyrý men joǵary tehnologııalar ǵasyrynda elektrondy kitaphanalar ashyq qoljetimdilikke, ýaqyt pen qarajatty únemdeýge baılanysty oqyrmandar arasynda úlken tanymaldylyqqa ıe ekenin atap ótti.

«Aımaqtardaǵy oqyrmandar alys bolǵandyqtan Baký qalasynyń kitaphanalaryna kire almaıdy. Elektrondyq kitaptar - bilim berý men bos ýaqytty ótkizý protsesinde yńǵaıly ǵana emes, sonymen qatar óz pikirlerińizdi ınternette bólisý múmkindigi», – dep atap ótti ol.

Tanystyrylymǵa qatysýshylar Qazaqstanmen kópjyldyq yntymaqtastyq týraly aıtyp, ózara túsinistik pen dostyqty nyǵaıtýǵa, qazaq ádebıetin Ázerbaıjanda tanymal etýge jáne eki baýyrlas halyqtyń birligine baǵyttalǵan osy gýmanıtarlyq-bilim berý jobasynyń mańyzy men jańashyldyǵyn atap ótti.

Qazaqstannyń Bakýdaǵy Elshiligi saıtynyń «Paıdaly materıaldar» bóliminde ázerbaıjan tilinde «Elektrondyq kitaphana» atty taqyryptyq blok bar. Jaqyn arada ol M.F.Ahýndov atyndaǵy Ázerbaıjan ulttyq kitaphanasynyń saıtynda da qoljetimdi bolady.