Bakýda qazaq jastarynyń uıymy quryldy
ASTANA. KAZINFORM – Qazaqstannyń Ázerbaıjandaǵy Elshiliginde Bakýda turatyn Qazaqstan azamattary men qazaq stýdentteriniń basqosýy ótti.
Qazaqstannyń Ázerbaıjandaǵy Elshisi Álim Baıel óz sózinde elimizdiń táýelsizdik kezeńindegi jetistikterine toqtalyp, memlekettiń syrtqy jáne ishki saıasatynyń negizgi baǵyttary týraly aıtyp berdi.
Dıplomat Qazaqstannyń Ázerbaıjanmen saıası, ekonomıkalyq, kólik-logıstıkalyq, qorǵanys, bilim, mádenı jáne týrısttik salalardaǵy yntymaqtastyǵynyń oń dınamıkasyn atap ótti. Qazaqstan men Ázerbaıjan iske asyryp jatqan iri óńirlik jobalardyń mańyzdylyǵyna nazar aýdardy. Olardyń arasynda Orta dálizdi damytý, Kaspıı teńizi arqyly ınternet jilisin jáne elektrokabeldi tartý bar.
Elshi 2023 jylǵy qarasha men 2024 jylǵy qarasha aralyǵynda QR Prezıdenti Qasym-Jomart Toqaevtyń Ázerbaıjanǵa saparmen tórt ret kelgenin, mundaı qarqynnyń ekijaqty qarym-qatynastarymyzdyń tarıhynda buryn bolmaǵanyn atap ótti. Sondaı-aq, Á. Baıel Qazaqstannyń basty baılyǵy onyń azamattary ekenin jáne Elshiliktiń qazaqstandyqtar úshin árdaıym ashyq ekendigin aıtty.
Іs-shara aıasynda Ázerbaıjannyń jetekshi joǵary oqý oryndarynda oqıtyn stýdentter «Orda» qazaq jastarynyń uıymyn qurdy. Uıymnyń maqsaty Ázerbaıjandaǵy qazaq stýdentterin biriktirý jáne qoldaý, mádenı baılanystardy nyǵaıtý men túrli is-sharalar ótkizý bolmaq.
Osy turǵyda Á. Baıel Altyn Ordanyń 800-jyldyǵyna oraılastyrylyp qurylǵan jastar uıymy ataýynyń sımvoldyq mánin atap ótti. Onyń atýynsha, memleketaralyq yntymaqtastyqty kúsheıtýdiń bir joly – azamattar arasyndaǵy baılanystar men dostyqtyń damýy. Osy turǵydaǵy oń kórsetkishterdiń biri – Ázerbaıjanda qazaq týrıstteri men stýdentteri sanynyń artýy.