Baqshasynda qarasora ósirgen Taraz turǵyny ustaldy
TARAZ. KAZINFORM – 44 jastaǵy Taraz turǵynyna qatysty quramynda esirtki zattary bar tyıym salynǵan ósimdikterdi zańsyz ósirý deregi boıynsha sotqa deıingi tergeý amaldary bastaldy.
Kúdiktini «Qarasora-2024» jedel-aldyn alý is-sharasyn ótkizý barysynda Esirtki qylmysyna qarsy is-qımyl basqarmasynyń qyzmetkerleri quryqtady.
Sondaı-aq saraıdan «keptirilgen marıhýana» esirtki zaty bar polıetılen paket jáne keptirý úshin kesip daıyndap qoıǵan 90 túp qarasora butasy tabyldy. Baqshadan taǵy 8 dana ósip turǵan qarasora butalary tabyldy. Alynǵan esirtki zatynyń jalpy salmaǵy 44 keli 800 gramdy qurady.
«Er adam qarasoranyń butalaryn ósirip, keptirip, paketterge orap qoıǵan. Ustalǵan adam narkologııalyq dıspanserde esepte turady. Buryn sotty bolǵan. Ol óz kinásin tolyq moıyndady. Qazirgi ýaqytta tergeý amaldary júrgizilýde», - deıdi PD Esirtki qylmysyna qarsy is-qımyl basqarmasy bastyǵynyń mindetin atqarýshy Asqar Jumabekov.
Aıta ketsek, buǵan deıin Astana qalasynda jyl basynan 578 keli esirtki tárkilengenin jazǵan bolatynbyz.
