Baǵdat Mýsın jaryq baǵanalaryn óz salasynda paıdalanbaq

NUR-SULTAN. QazAqparat –QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jaryq baǵanalaryn eki maqsatta qoldanýdy usynyp otyr, dep habarlaıdy QazAqparat tilshisi.

«Jaryq baǵanalaryn eki maqsatta qoldaný úshin ákimdiktermen memorandým jasasý jaǵyn qarastyryp jatyrmyz. ıAǵnı baǵana bir jaǵynan jaryq berse, ekinshi jaǵynan oǵan bazalyq stansa ornatylady. Endigi ýaqytta baılanysty qamtıtyn bazalyq stansalar turǵyn úılerdiń shatyrynda ǵana emes, jaryq baǵanalarynda da bolady», - dedi Baǵdat Mýsın elordada ótken «Ashyq esik kúni» sharasy barysynda.

Odan bólek, QR Tsıfrlyq damý, ınnovatsııalar jáne aeroǵarysh ónerkásibi mınıstriniń orynbasary Ashat Orazbek elimizde baılanys sapasyn jaqsartýǵa qatysty taǵy bir jańashyldyqpen bólisti.

«Joldardy salý jáne qaıta jańartý kezinde kabeldik kárizder men talshyqty-optıkalyq baılanys jelilerin mindetti túrde tóseý josparlanyp otyr. Bul respýblıkalyq, oblystyq jáne jergilikti joldarǵa da qatysty. Bul, aldymen, shaǵyn qalalar men qala mańyndaǵy eldimekender úshin mańyzdy. Sebebi ol jerde asa bıik ǵımarattar joq. Al eger jol salý barysynda kabeldik kárizderdi qosa tartsa, sol arqyly jaqyn mańdaǵy turǵyndardy baılanyspen qamtý múkindigi bolady», - deıdi Ashat Orazbek.