Baǵdat Mýsın SpaceX-pen kelissózder týraly aıtyp berdi

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «SpaceX» kompanııasymen kelissózder jóninde aıtyp berdi, dep habarlaıdy QazAqparat.

«Naýryz aıynyń sońynan beri biz SpaceX-pen kelissózder júrgizip jatyrmyz. Osy aralyqta SpaceX-tiń memlekettik retteýshilermen baılanys jónindegi dırektory Mett Botvınmen birneshe onlaın kezdesý ótkizdik. Yntymaqtastyqty damytý boıynsha bizge qyzyqty birneshe baǵyt bar.

Mınıstrliktiń maqsaty – Qazaqstandaǵy árbir eldi mekendi ınternetpen qamtý.

Teleport stantsııasyn Almaty mańynda ornalastyrýǵa jáne bes eldi mekendi testke qosýǵa aldyn ala kelisimder jasaldy. Aýyldarda ornatylatyn núktelerdiń sanyn áli de jumys barysynda naqtylaımyz.

Eger osy baǵytta jańalyqtar shyqsa men áleýmettik jelilerde bólisemin. Eki tarap arasynda tolyq kelisim men ózara túsinik paıda bolǵan ýaqytta bet alǵan baǵyt jaıly BAQ ókilderi úshin SpaceX-pen birlesken baspasóz relızin taratamyz», - dep jazdy ol

Mınıstrliń aıtýynsha, Starlink júıesi AQSh, Kanada jáne Eýropa elderiniń aýmaǵyn tolyǵymen qamtıdy. Qazir orbıtada «SpaceX» kompanııasynyń 1400-ge jýyq jerserigi ornalasqan.