Baǵdat Mýsın: Qala men aýyl balasynyń bilim aıyrmashylyǵy – 15%
Aqtóbege jumys saparymen kelgen Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «Bilim ALL» jobasymen tanysty. Qobda aýdany Taldysaı aýylyna baryp, muǵalimdermen, oqýshylarmen kezdesti.
«Aqtóbe oblysynyń aýyldarynda 200-ge jýyq mektep bar. Onyń 120-synda «Bilim ALL» jobasy qolǵa alyndy. Jobanyń damýyna ınternet qajet. Internetsiz qatynas, beınesabaq ta bolmaıdy. Sondyqtan, ınternet máselesin sheshý úshin barlyq mobıldi operatormen birge keldik. Ákimniń osyndaı joba uıymdastyryp jatqany Prezıdenttiń aýyldy kóterý týraly tapsyrmasyna kiredi. Pılottyq joba osy jerden bastaldy. Sebebi, qalaǵa qaraǵanda aýyl balalarynyń bilim deńgeıi tómen, 15% aıyrmashylyǵy bar. Al, ««Bilim ALL» jobasy joǵary bilikti mamandardy jınap, oqýshylarǵa onlaın sabaq berýge, olardyń biliktiligin arttyrýǵa múmkindik beredi. Balalarǵa ǵana emes, aýyl muǵalimderine de kerek. Olar tájirıbesin arttyrady», - dedi mınıstr Baǵdat Mýsın.
Jalpy, Aqtóbe oblysynda aýyldardaǵy 120 mekteptiń ınternet sapasy osy jobaǵa saı keledi dep eseptelgen. Bıyl qyrkúıekke deıin taǵy jıyrmasyn ınternetke qosý josparda bar. Al ózgesi 2024 jyldyń qyrkúıegine deıin qamtylady.
«Buryn «ınternet kerek» degen kezde oınaıdy, vıdeo qaraıdy dep aıtyldy. Al endi oqýǵa talpynǵan balalarǵa kerek degen kezde basqasha suraq týyndaıdy. Sondyqtan, biz osy jobaǵa respýblıkalyq deńgeıden qarajat bóle alamyz. Qazir «Qoljetimdi ınternet» ulttyq jobasy ázirlenip jatyr. Ony naýryz aıynyń basynda bekitemiz. Keıin qarajat bólinedi. Qarajatty mektepterdi ınternetke qosýǵa jumsaımyz. Árbir aýylǵa sym tartý, qubyr tartý sııaqty jumys. Aýylǵa ınternet jetkizý úshin bes jylda 190 mlrd teńge jumsalady. Kóbine optıkalyq, qıyn jerge stýpnıktik jeli qosylady», - dedi mınıstr.
Eske salsaq, Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Aqtóbede tanystyrylǵan «feldsher sómkesi» jobasyna qoldaý kórsetýge ýáde etti.
