Baǵdat Mýsın «Elektrondy qylmystyq is» jobasynyń halyqqa paıdasyn aıtyp berdi

ASTANA. QazAqparat - QR Bas prokýratýrasynyń quqyqtyq statıstıka jáne arnaıy esepke alý jónindegi komıtetiniń tóraǵasy Baǵdat Mýsın Qazaqstanda «Elektrondy qylmystyq is» jobasy qalaı iske asyrylatynyn jiliktep túsindirip berdi, dep habarlaıdy QazAqparat tilshisi.

«Tsıfrly Qazaqstan» baǵdarlamasy aıasynda qylmystyq isterdi elektrondy formatqa aýystyrýdy kezeń-kezeńimen júzege asyrý tapsyrylǵan bolatyn. Biz Estonııa, Saýd Arabııasy, Túrkııa, Grýzııa elderiniń tájirıbesin zerttedik. Qazirgi ýaqytta birshama elder qylmystyq isterdi elektrondy túrge aýystyrýdy júzege asyryp jatyr. Biraq, kóptegen elder osy júıege kóshýdi shashyrańqy túrde júrgizýde. Demek, bir el sot isin, ekinshi el sotqa deıingi tergeý amaldaryn elektrondy túrge aýystyrdy. Al eger biz osy jobany júzege asyrsaq, aryz túskennen bastap qylmysty tirkegennen keıin sot sheshimi shyǵyp, jazany ótegenge deıingi tolyq tsıkldy júıe jasap shyǵaramyz. Ony «Elektrondy ádilet» dep te ataýǵa bolady», - dedi Mýsın senatorlardyń Bas prokýratýrada ótken kóshpeli otyrysynda.

Onyń aıtýynsha, «Elektrondy qylmystyq is» jobasyn iske asyrý uzaq ýaqytty alady.

«Elektrondy qylmystyq is» jobasy qarapaıym azamatqa ne beredi? Birinshiden, aryzdy elektrondy formatta tapsyrýǵa bolady. Qazirgi ýaqytta ol elektondy sandyq qoltańba (ESQ) arqyly júzege asyrylyp jatyr. Endigi kezekte ESQ-syz azamattar aryz bere alatyndaı jumysty kúsheıtkeli jatyrmyz. Aryz berilgennen keıin telefon arqyly aryz ıesiniń shynynda sol ekenin SMS-habarlama arqyly ESQ-syn jiberip, aıǵaqtaıtyndaı júıe ázirlenýde. Tergeý jaýap alýǵa shaqyrǵan kezde aryz bergen azamattyń sol ekenine kóz jetkizetin bolady», - deıdi ol.

Jobanyń taǵy bir artyqshylyǵy - qylmystyq qýdalaýǵa qatysty barlyq azamattar qylmystyq isti elektrondy formatta qarap, jeke sektor arqyly advokattarmen birge qylmystyq qýdalaý barysyn baqylaı alady.

«Advokattyq kollegııa arqyly bul jumysty júrgizip jatyrmyz. Álbette, barlyq advokattar bir ýaqytta bul júıege úırenip ketpeýi múmkin. Qylmystyq isterdiń bir bóligi álbette elektrondy formatqa engizilmeıdi. Bul zańnamada qarastyrylǵan. Biraq, eger olardyń 90 paıyzyn elektrondy formatqa aýystyratyn bolsaq, onda adamdar eshqandaı qujattar joıylyp ketpeıtinine kóz jetkize alady. Sondyqtan, bul júıe eń aldymen ashyqtyqty qamtamasyz etedi», - dedi Baǵdat Mýsın.