Baǵanashyldaǵy balalardy eriksiz kóshirmek bolǵany úshin kim jaýap beredi

ASTANA. KAZINFORM — Premer-mınıstrdiń orynbasary Ermek Kósherbaev Almatydaǵy «Baganashyl» balalar úıiniń tárbıelenýshilerin Qonaevqa eriksiz kóshirýge qatysty jaǵdaıǵa pikir bildirdi.

— Shyndyǵynda, «Jmýrkı» fılmindegi sııaqty áreket etý kerek edi, ıaǵnı jaǵdaı shıelenise bastaǵanda bir qadam sheginip, kúte turý qajet. Men bala quqyǵy jónindegi ýákil Dınara Zákıevamen sóılestim, ol 24-i kúni ákimmen kezdesip, máseleni talqylaýy tıis bolǵanyn aıtty. Kommýnıkatsııany durys jolǵa qoıyp, isti sońyna deıin jetkizý qajet bolatyn, — dedi Ermek Kósherbaev Úkimet úıinde ótken baspasóz máslıhatynda.

Osy oraıda Úkimet basshysynyń orynbasary bolǵan oqıǵaǵa jergilikti atqarýshy organdary jaýapty ekenin aıtyp otyr. 

— Jaǵdaı baqylaýdan shyǵyp ketti. Ákim balalardy sondaı tásilmen shyǵarady dep kútpegenin aıtyp otyr, biraq bul ony jaýapkershilikten bosatpaıdy. Mundaı jaǵdaıǵa jol berýge bolmaıdy. Ýákiletti tulǵalardyń áreketi ókilettigi men jaýapkershiligi aıasynan shyǵyp ketti. Bul jaǵdaıdy jan-jaqty taldaý qajet, — dedi vıtse-premer.

Onyń aıtýynsha, balalar úıiniń tárbıelenýshileri Almaty qalasynyń turǵyndary emes, olar búkil oblystan jınalǵan. 

— Zań boıynsha bıýdjet pen barlyq shyǵyn Almaty oblysynan bólinýi tıis. Bul máseleni kóktemde nemese jaǵdaı týyndaı bastaǵan sátte sheshý kerek edi, — dep tolyqtyrdy Ermek Kósherbaev.

Eske salsaq, Almatyda ornalasqan oblystyq Balalar úıiniń tárbıelenýshileri Qonaev qalasyna kóshýge narazylyq bildirdi. 

Biraq, Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtin boldy. 

Sondaı-aq Prezıdent Ákimshiliginiń komıssııasy «Baǵanashyl» balalar úıine bardy.