«Baǵanashyl» balalar úıiniń tárbıelenýshileri Almatydaǵy balalar ortalyǵyna kóshirildi
ALMATY. KAZINFORM – Almatyda «Januıa» kesheni men «Baǵanashyl» balalar úıi jańǵyrtylady.
Almaty ákimdiginiń málimetinshe, №2 Balalardy qoldaý ortalyǵyna «Baǵanashyl» balalar úıiniń tárbıelenýshileri men qyzmetkerleri ýaqytsha kóshirildi. Qazir munda 122 bala turyp jatyr.
- 1963 jyly salynǵan ǵımaratqa kúrdeli jóndeý qajet. Bul jumystardy jeke kompanııa óz qarajatyna atqarýǵa daıyn. Barlyq atqarylyp jatqan sharalar balalarǵa qolaıly jaǵdaı jasaýǵa jáne Memleket basshysynyń áleýmettik saladaǵy tapsyrmalaryn oryndaýǵa baǵyttalǵan, - dep habarlady ákimdikten.
Qazir balalar úıiniń ǵımaratyna ınjenerlik-tehnıkalyq tekserý júrgizilip, jobalyq-smetalyq qujattar ázirlenip jatyr.
Odan bólek Almaty qalasynyń ákimdigi «Januıa» kesheni – Memleket basshysynyń tapsyrmasymen tolyq jańǵyrtylyp jatqanyn atap ótti. 1960-jyldary salynǵan eski ǵımarat qazirgi talaptarǵa saı bolmaǵan. Jańa nysan 15 qyrkúıekte paıdalanýǵa berilmek.
- Ol 400 oqýshy orny men 216 jatyn orynǵa eseptelgen. Joba jeke kompanııa men kómek qorynyń qoldaýymen, bıznestiń áleýmettik jaýapkershiligi aıasynda júzege asyrylyp jatyr, - dep habarlady ákimdikten.
Eske salaıyq, 21 shilde kúni «Baǵanashyl» balalar úıiniń tárbıelenýshileri Almatydan Qonaevqa kóshirile bastady. Alaıda balalar buǵan narazylyq bildirip, áleýmettik jelide mekeme ishindegi kıkiljińniń beınejazbasy tarady.
Keıin Prezıdent keńesshisi — baspasóz hatshysy Rýslan Jeldibaı Prezıdent tapsyrmasymen «Baǵanashyl» balalar úıi Almatydan Qonaevqa kóshirilmeıtinin málimdedi.
Sonymen qatar «Baǵanashyl» balalar úıine baılanysty ýákiletti tulǵalarǵa qatysty qyzmettik tekserý bastaldy.
Keıin «Baǵanashyl» balalar úıindegi daýdan keıin úsh sheneýnik qyzmetinen bosatyldy.