BAÁ-de Ózbekstannyń úsh azamaty ólim jazasyna kesildi
ASTANA.KAZINFORM - Sot lańkestik áreket dep tanyǵan Ámirlikterdegi evreı qaýymy ókilin óltirý isi boıynsha úkim shyqty, dep habarlaıdy Kazinform agenttiginiń menshikti tilshisi.
Dúısenbi, 31 naýryz kúni Abý-Dabıdegi Federaldy apellıatsııalyq sot Moldova azamaty ızraıldik Tsvı Kogandy urlap óltirgeni úshin úsh er adamdy ólim jazasyna, tórtinshisin ómir boıyna bas bostandyǵynan aıyrýǵa úkim shyǵardy.
Biraýyzdan qabyldanǵan úkim sottalýshylardy terrorıstik nıetpen qasaqana kisi óltirdi dep aıyptady, dep habarlaıdy WAM aqparattyq agenttigi.
Birikken Arab Ámirlikteriniń bas prokýrory Hamad Saıf ál-Shamsıdiń 2025 jyldyń qańtarynda sot talqylaýyn ótkizýge shaqyrǵan buıryǵynan keıin bul is jyldam qaraldy.
BAÁ memlekettik qaýipsizdik prokýratýrasynyń tergeýi aıyptalýshynyń Kogandy nysanaǵa alyp, qasaqana shabýyl jasaǵanyn anyqtady. Sotqa eleýli aıǵaqtar, sonyń ishinde aıyptalýshynyń tolyq moıyndaýy, sot-medıtsınalyq saraptama qorytyndylary, saraptama nátıjeleri, qylmys qarýy jáne kýágerlerdiń sózderi usynyldy.
Sot negizgi úsh qylmyskerdi ólim jazasyna kesti. Al olarǵa kómektesken tórtinshi sybaılasy jazasyn ótegen soń elden jer aýdarylyp, ómir boıyna bas bostandyǵynan aıyryldy. BAÁ zańyna sáıkes, ólim jazasyna kesilgen úkimder avtomatty túrde apellıatsııaǵa beriledi jáne ony Federaldy Joǵarǵy Sottyń qylmystyq bólimi qaraıdy.
Úkim shyǵarylǵannan keıin Bas prokýror Ál Shamsı bul úkim BAÁ-niń eń joǵary ádilettilik standarttary men zań ústemdigine sáıkes lańkestikpen kúresý, sonymen birge ádil sot kepildigin qamtamasyz etýdegi myzǵymas ustanymyn kórsetetinin basa aıtty.
Ol BAÁ sot júıesi ulttyq qaýipsizdik pen turaqtylyqqa nuqsan keltirý áreketterine tabandy túrde qarsy turatynyn atap ótti.
Sonymen qatar Bas prokýror Birikken Arab Ámirlikteri birge ómir súrý men toleranttylyqtyń jahandyq úlgisi bolyp tabylatynyn, onda zańdar dini men etnıkalyq tegine qaramastan barlyq turǵyndy qorǵaıtynyn, olardyń qaýipsizdigin qamtamasyz etetinin qosa aıtty.
Aıta keteıik, 2024 jyldyń 26 qarashasynda BAÁ bıligi Izraıl jáne Moldova azamaty Tsvı Kogandy óltirdi degen úsh kúdiktini qamaýǵa alǵan bolatyn. Joǵalǵan adamnyń denesi 24 qarashada Ál-Aın qalasynan tabyldy.
BAÁ-de ómir súrgen Kogan búkil álem boıynsha fılıaldary bar pravoslavıelik evreı tobynyń ókili boldy.
Izraıl premer-mınıstri Bınıamın Netanıahý keńsesi birden Kogannyń óltirilýin aıyptap, ony «antısemıttik lańkestik áreket» dep atady.
Buǵan deıin Sýdan BAÁ-ge qarsy halyqaralyq sotqa shaǵym túsirgenin jazǵan bolatynbyz.