BAÁ-de Qazaqstan pasportyn 30 kún ishinde resimdeýge bolady

NUR-SULTAN. QazAqparat - BAÁ-de júrgen Qazaqstan azamattary ulttyq pasportty Abý-Dabıdegi QR Elshiliginde jáne Dýbaıdaǵy QR Bas konsýldyǵynda 30 kún ishinde resimdeı alady. Buryn bul protsedýra 80 kún alatyn, dep habarlaıdy QazAqparat QR Syrtqy ister mınıstrligine silteme jasap.

«Qazaqstannyń syrtqy jáne ishki ister mınıstrlikteri Prezıdent Qasym-Jomart Toqaevtyń Qazaqstan halqyna Joldaýyn iske asyrý sheńberinde pılottyq rejımde «Qazaqstan Respýblıkasynyń shet elderdegi mekemelerinde qujattandyrý» tirkeý pýnkti» qoldanbaly baǵdarlamalyq qamtamasyz etý arqyly qazaqstandyq azamattardy elektrondyq qujattandyrýdy engizý boıynsha jumysty jalǵastyryp jatyr», - delingen vedomstvo málimdemesinde.

Aıta ketsek, elektrondyq qujattandyrý júıesi Qazaqstannyń AQSh-taǵy (Vashıngton, Nıý-Iork, San-Frantsısko), Germanııadaǵy (Berlın, Maındaǵy Frankfýrt, Mıýnhen, Gannover), Japonııadaǵy (Tokıo), Koreıa Respýblıkasyndaǵy (Seýl), Ózbekstandaǵy (Tashkent) jáne Reseıdegi (Máskeý) sheteldik mekemelerinde iske qosylǵan.

Eske salsaq, kóshi-qon qyzmeti tólqujatta chıptiń qandaı maqsatpen qoıylǵanyn túsindirgen edi.