Azyq-túlik qymbattamaý úshin qandaı sharalar qolǵa alyndy – Úkimet
Premerdiń aıtýynsha, azyq-túlik qaýipsizdigin qamtamasyz etý – Úkimettiń strategııalyq mindeti.
«Álemdegi geosaıası jaǵdaıdyń shıelenisýi, ónimder men shıkizat jetkizýdiń jahandyq tizbekteriniń buzylýy saldarynan azyq-túlik qaýipsizdigi eń ózekti máselege aınalyp otyr. Osyǵan baılanysty ótken jyly Qazaqstan Respýblıkasynyń azyq-túlik qaýipsizdigin qamtamasyz etýdiń 2022-2024 jyldarǵa arnalǵan jospary qabyldandy. Onda egis alqaptaryn ulǵaıtý jáne negizgi aýyl sharýashylyǵy daqyldarynyń túsimin arttyrý kózdelgen», - dedi Álıhan Smaıylov Úkimettiń búgingi otyrysynda.
Sondaı-aq mal basyn ósirýge jáne mal sharýashylyǵynyń ónimdiligine basa nazar aýdarylyp otyr.
«Jalpy ótken jyly aýyl sharýashylyǵy ónimderin ulǵaıtý jáne egis alqaptary kólemin arttyrý esebinen elimizdiń agroónerkásiptik kesheni damýdyń oń serpinin kórsetti. Máselen, aýyl sharýashylyǵynyń jalpy ónim kólemi 9% ulǵaıyp, 9,3 trln teńgeni qurady. Ósýdiń negizgi faktory bolǵan egin sharýashylyǵynda ónim óndirý kólemi 15% artty. Jospardy iske asyrýmen birge, deldaldyq shemalardyń jolyn kesý, áleýmettik mańyzy bar azyq-túlik baǵasyna monıtorıng júrgizý jáne naryqtyq retteý sharalary belsendi túrde iske asyrylýda. Qabyldanǵan sharalar oń nátıje berdi», - dedi Úkimet basshysy.
Onyń aıtýynsha, ótken 2 aptada negizgi azyq-túlik baǵalarynyń ósýi tirkelgen joq. Agroónerkásip salasynda birqatar jobalar boıynsha tıisti jumys júrgizilýde.
«Atap aıtqanda, óndiristi odan ári ártaraptandyrý úshin 65 taýarly-sút fermasy iske qosylady. Dúnıejúzilik janýarlar densaýlyǵyn saqtaý uıymymen birge Qazaqstannyń janýarlardyń asa qaýipti ınfektsııalary boıynsha turaqty degen mártebesin alý jumystary jalǵasýda. Bul ótkizý naryqtaryn keńeıtýge jáne et ónimderiniń eksportyn ulǵaıtýǵa múmkindik beredi», - dedi Á. Smaıylov.