Azýyńdy kórset – Premer-Mınıstr sapasyz joldardy qabyldamaý jóninde

ASTANA. KAZINFORM – QR Kólik mınıstrligi «Jol aktıvteri sapasynyń ulttyq ortalyǵy» RMK basshysy Bolatbek Aıtbaev óńirlerde teris qorytyndy berilgen joldardyń da paıdalanýǵa berilgenin aıtty.

«Problemalardyń biri – jergilikti atqarýshy organdar jol sapasyna jasalǵan ekspertızaǵa salǵyrt qaraıdy. Tipti sapa ortalyǵy teris qorytyndy berse de, bóten zerthanalardyń oń qorytyndysymen jergilikti mańyzdaǵy joldar paıdalanýǵa berilip jatyr», - dedi B. Aıtbaev Úkimet otyrysynda.

Premer-Mınıstr Oljas Bektenov munyń sebebin surady.

«Ne kedergi? Sizderdiń eskertýlerińiz mindetti túrde oryndalýy úshin, qorytyndy berilmeı, aktilerge qol qoıylmaýy úshin qandaı sheshimder qabyldaý kerek? Merdigerlerge mıllıardtaǵan qarajat aýdaryldy, al sapa joq», - dedi O. Bektenov.

Óz jaýabynda ortalyq basshysy barlyq qajetti shara qabyldanǵanyn, normatıvterge túzetý engizilgenin jetkizdi. Bar bolǵany oblystar normatıv talaptaryn qatań saqtaýy kerek.

«Normatıvter bar. Ózińiz bekitpeıinshe eshbir aktige qol qoıylmaýy kerek. Ol úshin aıbatty asyryp, azý kórsetý kerek», - dedi Premer-Mınıstr.