Ázimbek Pazylbekuly Túrkistan qalasynyń ákimi bolyp taǵaıyndaldy
TÚRKІSTAN. KAZINFORM - Qazaqstan Prezıdenti Ákimshiliginiń kelisimi boıynsha oblys ákiminiń ókimimen Ázimbek Pazylbekuly Túrkistan qalasynyń ákimi laýazymyna taǵaıyndaldy. Jańa ákimdi qala aktıvine oblys ákimi Darhan Satybaldy tanystyrdy.
Qalalyq máslıhat depýtattary qala ákimi laýazymyna usynylǵan Ázimbek Pazylbekulynyń kandıdatýrasyn qoldap, daýys berdi. Túrkistan oblysynyń ákimi Darhan Satybaldy shahardyń jańa basshysyna Túrkistan qalasyn damytý, Túrki áleminiń ortalyǵyna aınaldyrý, týrıstik jáne ekonomıkalyq áleýetin kóterý baǵytynda mańyzdy mindetter júktelip otyrǵanyn aıtyp, aldaǵy jumysyna sáttilik tiledi.
Ázimbek Pazylbekuly 1991 jyly Qyzylorda oblysy, Jańaqorǵan aýdanynda dúnıege kelgen. Bilimi – joǵary. Ál-Farabı atyndaǵy Qazaq ulttyq ýnıversıteti, Qorqyt Ata atyndaǵy Qyzylorda memlekettik ýnıversıtetin, M.S.Nárikbaev atyndaǵy Qazaq memlekettik zań ýnıversıtetin jáne «Bolashaq» ýnıversıtetin bitirgen. Mamandyqtary – memlekettik jáne jergilikti basqarý, ekonomıka, qurylys, quqyqtaný.
Eńbek jolyn 2013 jyly Qyzylorda qalalyq ishki saıasat bólimi jetekshi mamanynyń mindetin atqarýshy bolyp bastap, jetekshi maman, bas maman qyzmetterin atqardy. 2015 jyly Qyzylorda qalasynyń ákimi apparaty uıymdastyrý-ınspektorlyq bóliminiń bas ınspektory bolsa, odan keıin Qazaqstan Respýblıkasy Ulttyq ekonomıka mınıstrliginiń qurylys, turǵyn úı-kommýnaldyq sharýashylyq isteri jáne jer resýrstaryn basqarý komıtetiniń kommýnaldyq sharýashylyq basqarmasynyń sarapshysy, bas sarapshysy bolyp eńbek etti. 2017 jyldan bastap Qazaqstan Respýblıkasy Investıtsııalar jáne damý mınıstrliginiń qurylys jáne turǵyn úı-kommýnaldyq sharýashylyq isteri komıteti kommýnaldyq sharýashylyq basqarmasynyń bas sarapshysy, basshysy bolyp jumys istegen.
Qazaqstan Respýblıkasy Investıtsııalar jáne damý mınıstrligi men Qazaqstan Respýblıkasy Indýstrııa jáne ınfraqurylymdyq damý mınıstrliginiń basqarmalaryn basqardy. Qazaqstan Respýblıkasy Indýstrııa jáne ınfraqurylymdyq damý mınıstrligi qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary, Qazaqstan Respýblıkasy Ónerkásip jáne qurylys mınıstrligi qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary laýazymdarynda abyroıly eńbek etti.
