Azııadaǵy eń úzdik ýnıversıtetterdiń biri City University of Hong Kong Almatyda óz fılıalyn ashty
ASTANA. KAZINFORM – Búgin Sátbaev ýnıversıteti bazasynda CityU Zertteý jáne ınnovatsııalar ınstıtýtynyń (CityUHK Institute of Research and Innovation – CIRI) resmı ashylý saltanaty ótti. Bul týraly Ǵylym jáne joǵary bilim mınıstrligi málimdedi.
Bul – Qazaqstanda ashylǵan alǵashqy ǵylymı-bilim berý ınstıtýty. Ol Memleket basshysy Qasym-Jomart Toqaevtyń tapsyrmasyn júzege asyrý aıasynda Gonkongtyń CityU (City University of Hong Kong) ýnıversıtetimen birlesip qurylyp otyr.
Jańa ınstıtýt álemdik deńgeıdegi kadrlardy daıarlaý men transshekaralyq ǵylymı áriptestik úshin tamasha alańǵa aınalady. Bul – CityU-dyń Qytaıdan tys jerde ashylǵan alǵashqy fılıaly ári Qytaı úshin de, Qazaqstan úshin de mańyzdy tarıhı kezeńniń bastamasy. Qazaqstandyq 100 stýdent álemniń eń úzdik ýnıversıtetteriniń birinde oqýyn bastady.
– Sheteldik ýnıversıtet fılıalynyń Sátbaev ýnıversıtetinde ashylýy – QR Ǵylym jáne joǵary bilim mınıstrliginiń Qazaqstanda bilim men ǵylym sapasyn arttyrýǵa baǵyttalǵan aýqymdy baǵdarlamasynyń bir bóligi. Memlekettik qoldaýdyń arqasynda qazaqstandyq stýdentter CityU syndy álemdik deńgeıdegi ǵylymı ortalyqtarda joǵary sapaly bilim alýǵa múmkindik alyp otyr, – dedi óz sózinde Sátbaev ýnıversıtetiniń rektory Meıram Begentaev.
Fılıaldyń ashylý saltanatyna QR ǴJBM vıtse-mınıstri Dınara Şeglova, Almaty qalasy ákiminiń orynbasary Azamat Qaldybekov, QHR-nyń bas konsýly Tszıan Veı jáne basqa da resmı tulǵalar qatysty.
– Búgin biz tek fılıal ashyp qana qoımaı, jahandyq deńgeıde oılaıtyn kóshbasshylar men jańashyl ǵalymdardy daıarlaýǵa negiz qaladyq. Olar adamzattyń ózekti máselelerin sheshýge úles qosyp, Qazaqstan men Gonkongtyń, sondaı-aq búkil álem qaýymdastyǵynyń órkendeýine qyzmet etedi, – dedi CityU Dırektorlar keńesiniń tóraǵasy Maıkl Ngaı.
Sondaı-aq CityU men Sátbaev ýnıversıteti arasynda PhD deńgeıindegi qos dıplomdy bilim berý baǵdarlamasyn iske qosý týraly memorandýmǵa qol qoıyldy. Bul – qazaqstandyq ýnıversıtet pen álemniń TOP-100 ýnıversıtetteri qataryna kiretin bedeldi joǵary oqý orny arasynda jasalǵan alǵashqy kelisim.
– Bedeldi sheteldik ýnıversıtet fılıalynyń Almaty qalasynda resmı ashylý saltanatymen shyn júrekten quttyqtaımyn! Bul qadam qazaqstandyq stýdentterdiń CityU jáne Sátbaev ýnıversıteti syndy aldyńǵy qatarly JOO-larda álemdik deńgeıde bilim alýyna jol ashady. CIRI tek zertteý jáne ınnovatsııalyq ortalyq qana emes, sonymen qatar jańa resýrsty únemdeıtin tehnologııalar men jańalyqtardy qala ekonomıkasyna engizýge sep bolady ári Almatyny Ortalyq Azııa aımaǵyndaǵy jetekshi bilim berýshi ortalyq retinde nyǵaıtatynyna senimdimin, – dedi Almaty qalasy ákiminiń orynbasary Azamat Qaldybekov.
CityU – álemdegi eń jyldam damyp kele jatqan jas ǵylymı-zertteý ýnıversıtetteriniń biri. Ol az ǵana ýaqyt ishinde QS reıtıngi boıynsha 62-orynǵa, al Times Higher Education tizimi boıynsha 78-orynǵa shyqty. Stenford ýnıversıtetiniń málimetinshe, CityU-dyń 170-ten astam oqytýshysy álemdegi eń kóp dáıeksóz keltirilgen ǵalymdardyń top-2% qataryna kiredi.
Eki ýnıversıtet arasynda osyǵan deıin qol qoıylǵan strategııalyq seriktestik kelisimge sáıkes Materıaltaný (Material Science), Jasandy ıntellekt, Kompıýterlik ǵylymdar (Computer Science) jáne Azamattyq qurylys (Civil Engineering) mamandyqtaryna baǵyttalǵan qos dıplomdy bilim berý baǵdarlamalary iske qosyldy. Bakalavrıatta oqý «2+2» jáne magıstratýrada oqý «1+1» formaty boıynsha ótedi.
Fılıaldaǵy oqý stýdentterge QR Ǵylym jáne joǵary bilim mınıstrliginiń memlekettik granty negizinde tolyqtaı aǵylshyn tilinde bilim alýǵa múmkindik beredi. Bakalavrlar alǵashqy 2 oqý jylyn Almatyda ótkizse, sońǵy 2 jyldy Gonkongta ótkizedi. Al PhD baǵdarlamasynyń qatysýshylary Gonkongtaǵy oqý barysynda álemdik ǵylymı zerthanalarda jetekshi ǵylymı toptarmen birge taǵylymdamadan ótedi.
Sátbaev ýnıversıteti bazasynda CityU Zertteý jáne ınnovatsııalar ınstıtýtynyń ashylýy – Memleket basshysynyń tapsyrmasyn jáne joǵary bilim men ǵylymdy damytý tujyrymdamasyn júzege asyrý jolyndaǵy mańyzdy qadam.
Álemniń jetekshi ýnıversıtetteriniń biriniń fılıalyn ashý – Qazaqstannyń joǵary bilim júıesin damytýǵa, jahandyq tájirıbelerdi engizýge, bilim berý sapasyn arttyrýǵa jáne sheteldik stýdentterdi tartýǵa baǵyttalǵan mańyzdy bastamasy.
Aıta keteıik, 2026 jyldan bastap Nazarbaev ýnıversıteti, MÁMS pen AHQO-ny qarjylandyrý mehanızmi ózgeredi.