Azııa oıyndary: 3 qazaqstandyq fınalǵa shyqty

Qytaıda ótip jatqan Azııa oıyndarynda qazaqstandyq úsh sportshy fınalda óner kórsetedi. QazAqparat bul týraly QR Týrızm jáne sport mınıstrligine silteme jasap habarlaıdy.

1000 metr qashyqtyqqa baıdarkada esýden óner kórsetken Kırıll Týbaev irikteý kezeńinde 2-oryn alyp, fınalǵa joldama aldy.

500 metr qashyqtyqqa qos baıdarkadan áıelder arasyndaǵy irikteý kezeńinde Irına Podoınıkova men Olga Shmeleva 1:49.240 ýaqytpen 1-oryn alyp, fınalǵa shyqty.

Aqtyq kezeńge sondaı-aq Igor Rıashentsev pen Andreı Ergýchev ótti. Olar 500 metr qashyqtyqqa qos baıdarkadan erler arasyndaǵy irikteý kezeńinde 1:38.338 ýaqytty kórsetip 2-oryn aldy.

Al 1000 metr qashyqtyqqa kanoeda esýden Tımofeı Emelıanov 4:10.107 ýaqyt kórsetkishimen 4-orynǵa ıe bolyp, 1/2 fınalda óner kórsetýge múmkindik aldy.

Eske salaıyq, buǵan deıin 30 qyrkúıek kúni Qazaqstan sportshylary qatysatyn jarystar tizimin usynǵan bolatynbyz. 

Hanchjoýda Azııa oıyndary 23 qyrkúıek - 8 qazan aralyǵynda ótip jatyr.

Qazir Qazaqstan medaldar kestesinde 11-orynda tur. Qorjynda ázirge 26 medal bar – 3 altyn, 4 kúmis jáne 19 qola.

Týrnırdiń absolıýtti lıderleri burynǵysha – Qytaı (200 medal: 105 — 63 — 32), Japonııa (99 medal: 27 — 35 — 37) jáne Ońtústik Koreıa (102 medal: 26 — 28 — 48).