Balaeva: Teatr óneri – talant pen talǵam, shynaıylyq pen adaldyqtan týǵan tekti óner

ASTANA. KAZINFORM — 27 naýryzda búkil álemde barsha teatr qyzmetkerleriniń kásibı merekesi – Dúnıejúzilik teatr kúnin atalyp ótedi.

 Teatr — adam janynyń aınasy, oı men sezimniń úılesimi, ómirdiń túrli qyrlaryn sahnada sheber jetkizetin uly óner. Teatr — qoǵamnyń mádenı damýyna yqpal etetin qural.

«Qazaqstanda teatr ónerine qyzyǵýshylyq artyp keledi. Zal kórermenge toly, qoıylymdardyń premerasyna bıletter eki-úsh apta buryn satylyp ketedi. Sahna ónerine qushtar jandardyń arasynda jastardyń kóp bolýy kóńilge erekshe qýanysh uıalatady» dep atap ótti Prezıdent Qasym-Jomart Toqaev IV Ulttyq quryltaı otyrysynda.

Búginde Qazaqstanda 70 teatr jumys isteıdi, olardyń 57-si — memlekettik teatr. Atap aıtsaq, 11 respýblıkalyq, 46 óńirlik teatr bar. Keıingi tórt jylda elimizde bes jańa memlekettik teatr ashyldy. Bul teatr óneriniń damyp kele jatqanyn, suranysqa ıe ekenin kórsetedi.

— Qazaqstandyq teatrlar otandyq kórermendi jańa qoıylymdarmen qýantyp qana qoımaı, elimizdi halyqaralyq arenada da tanytyp keledi. 2024 jyly 396 gastroldik sapar uıymdastyrylsa, onyń 350-i el ishinde, 46-sy shetelde ótti, — dedi Aıda Balaeva.

Otandyq teatrlarda 9 myńǵa jýyq maman jumys isteıdi, onyń 4 200-i shyǵarmashylyq ujym ókilderi. Bir jyl ishinde Qazaqstannyń memlekettik teatrlary 200-den astam jańa qoıylym qoıdy, olardyń 107-si otandyq avtorlardyń shyǵarmalary negizinde sahnalanǵan.

— Teatr óneri — talant pen talǵam, shynaıylyq pen adaldyqtan týǵan tekti óner. Osynaý erekshe kúni sahnada jáne sahna syrtynda eńbek etip júrgen barsha jandy quttyqtaımyn! Olar — akterler, rejısserler, dramatýrgter, stsenograftar, jaryq jáne dybys qoıýshy mamandar, kostıýmerler, grımerler, ákimshiler men tehnıkalyq mamandar. Eń bastysy, bul qasterli ónerdi jan-tánimen jaqsy kóretin barsha kórermenge alǵysym sheksiz. Kórermenniń ystyq yqylasy men qoldaýy teatrdyń máńgilik ómir súrýiniń kepili. Sol sebepti teatrǵa kelýshi árbir janǵa, ónerdi baǵalaıtyn ár kórermenge de erekshe alǵys aıtamyn. Ónerdiń kıeli ordasy — teatr máńgi jasaı bersin! Dúnıejúzilik teatr kúni qutty bolsyn, — dedi Mádenıet jáne aqparat mınıstri Aıda Balaeva.

Aıta ketelik Prezıdent bıznes ókilderin aımaqtyq teatrlardy qoldaýǵa shaqyrǵan edi.