Áziret Sultan meshitinde myń otbasyǵa tegin azyq-túlik taratyldy
Atalǵan bastama - Elorda aýmaǵyndaǵy 12 meshittiń birikken qaıyrymdylyq sharasy.
«Qazaqstan musylmandary dinı basqarmasynyń tóraǵasy, bas Múftı Naýryzbaı qajy Taǵanuly qasıetti Ramazan aıynda jáne karantınde muqtaj jandarǵa kómektesý týraly bastama kótergen edi. Qaıyrymdylyq bastamasy bizde ǵana emes, elimizdiń barlyq meshitterinde jalǵasyn taýyp jatyr. Ár meshit óz kólemine, qarajatyna qaraı kómektesedi. Búgingi shara - elorda aýmaǵyndaǵy 12 meshittiń birlese uıymdastyrýymen, demeýshi azamattardyń uıytqy bolýymen júzege asty», - dedi Áziret Sultan meshitiniń baspasóz hatshysy Aıdos Imantaı QazAqparat tilshisine bergen suhbatynda.
Azyq-túlik sómkeleri meshitterge júgingen muqtaj jandar tizimi boıynsha taratylady.
«Buǵan deıin meshitke kómekke júgingen kópbalaly, muqtaj, asyraýshysynan aıyrylǵan jandar bar. Olar óz jaǵdaıyn aıǵaqtaıtyn arnaıy qujat ótkizgen. Elorda meshitterindegi tizimderdi qarastyryp, myń otbasyna habarlastyq jáne eń qajetti degen azyq-túlik sómkesin ázirledik», - dedi A. Imantaı.
