AJTQ júıesi jol-kólik apaty kezinde myńdaǵan adamnyń ómirin qutqarady

ASTANA. QazAqparat - 2017 jyldan bastap apatty jaǵdaıdaǵy tótenshe qońyraý (AJTQ) qazaqstandyq júıesi synamaly rejımde qoldanýǵa beriledi, dep habarlady Qazǵarysh baspasóz qyzmeti.

AJTQ avtomattanǵan aqparattyq júıesi avtokólik quraldaryna ornatylǵan bort termınaldarynan apat týraly habar alady jáne Qazaqstannyń barlyq oblysyndaǵy biryńǵaı kezekshi-dıspetcherlik qyzmetke (BKDQ 112) habarlaı alady.

Óz kezeginde, AJTQ júıesiniń arnaıy úıretilgen operatory BKDQ 112 elektrondy karta arqyly naqty koordınatany anyqtap, daýys qyzmeti arqyly júrgizýshimen tildesip, alynǵan aqparatty jedel óńdeıdi jáne jedel qyzmetterge (jedel járdem, jol-patrýl qyzmeti) joldaıdy.

AJTQ júıesiniń vırtýaldy uıaly operatory qurylǵansha, bort termınalynan derekter alý qyzmetin el aýmaǵyn barynsha qamtıtyn qazaqstandyq uıaly baılanys operatorlarynyń biri atqarady.

2017-2019 jyldary apparat quraldary satyp alynady, AJTQ júıesiniń vırtýaldy uıaly operatory qurylady jáne jol-kólik apaty týraly tótenshe qyzmetke jyldam aqparat berýge arnalǵan «ERA-GLONASS», «ERA-RB» júıelerimen jáne «eCall» birikken eýropalyq avtomobıl júıesimen úılestirý jumystary júredi.