Ajar Ǵınııat: Aǵzamdy donor retinde berýge kelisemin
ASTANA. KAZINFORM – Densaýlyq saqtaý mınıstri Ajar Ǵınııat ólimnen keıingi aǵza donorlyǵy týraly pikir bildirdi.
Májilis otyrysynan keıin BAQ ókilderine suhbat bergen mınıstr A.Ǵınııat qaıtys bolǵannan keıin aǵzasyn donorlyqqa berýge kelisetinin aıtty
«Jeke siz ólimnen keıingi aǵza donorlyǵyna kelisesiz be?» - degen suraqqa «Kelisemin» dep jaýap berdi.
Sondaı-aq, ol osy másele týraly arnaıy regıstrde 40 myńnan astam adam pikir bildirgenin aıtty.
«Adam ómirin saqtaý úshin keıbir qaıtys bolǵan adamdar nemese olardyń týystary óz aǵzalaryn qıyn jaǵdaıda júrgen, sozylmaly aýrýlary bar, júregin, búıregin almastyrýdy qajet etetin adamdarǵa aǵzasyn bere alady. Zań júzinde oǵan qajetti barlyq normalar bar. Sonymen qatar mınıstrlik janyndaǵy mekemede jasalǵan elektrondy regıstr bar. Bizdiń árbir kámeletke tolǵan azamat sol regıstrde óz aǵzasyn ólgennen keıin basqa muqtaj adamǵa berý máselesi boıynsha paıymyn jazyp kete alady. Búgingi tańda 40 myńnan astam el azamaty osy regıstrde oıyn bildiripti. Sonyń 15 paıyzy qaıtys bolǵannan keıin óz aǵzasyn basqa azamattardyń ómirin saqtaý úshin berýge kelisetinin aıtqan.
«Bul másele qoǵamnyń keshendi talqylaýy arqyly rettelý kerek. Mınıstrlik bul baǵytta aýqymdy túsindirý jumystaryn júrgizip jatyr», - dedi Ajar Ǵınııat.
