Ázerbaıjanda saılaý naýqany bastaldy
ASTANA. KAZINFORM – Búgin Ázerbaıjanda 2024 jylǵy 1 qyrkúıekte ótetin kezekten tys parlamenttik saılaýǵa baılanysty saılaý aldyndaǵy úgit-nasıhat naýqany bastaldy.
Úgit - nasıhat naýqany 23 kúnge sozylady. Atap aıtsaq, 9 tamyzdan 31 tamyzda saǵat 08:00-ge deıin jalǵasady.
Saılaý aldyndaǵy úgitti júrgizýdi tirkelgen kandıdattardyń ýákiletti ókilderi, saıası partııalar men partııalardyń bloktary júzege asyratyn bolady.
Buǵan deıin Ázerbaıjannyń Ortalyq saılaý komıssııasynyń otyrysynda OSK tóraǵasy Mazahır Panahov depýtattyqqa tirkelgen 305 kandıdat Ázerbaıjannyń 25 saıası partııasynyń ókili ekenin habarlady.
Onyń aıtýynsha, 25 saıası partııadan 459 adam usynylǵan, olardyń 305-i tirkelgen. Qazirgi ýaqytta depýtattyqqa 1 030 kandıdat tirkelip saıası dodaǵa túsýge daıyn.
Panahov úgit-nasıhat naýqanyn ótkizý úshin respýblıka aýmaǵynda 3 259 ashyq alań jáne 1 854 jabyq úı-jaı bólingenin habarlady.
Esterińizge sala keteıik, 28 maýsymda Ázerbaıjan prezıdenti Ilham Álıev VI shaqyrylymdaǵy Mıllı Májilisti taratý jáne kezekten tys parlamenttik saılaýdy taǵaıyndaý týraly buıryqqa qol qoıdy. Qujatqa sáıkes, saılaý 2024 jyldyń 1 qyrkúıeginde ótedi. Eldegi sońǵy parlamenttik saılaý 2020 jyldyń 9 aqpanynda ótti.
Ázerbaıjan Ulttyq Assambleıasy nemese Mıllı Májilisi – bir palataly parlament, ár bes jyl saıyn 125 okrýgten bir adamnan turatyn kópshilik saılaý júıesi negizinde 125 depýtat saılanady.
