Ázerbaıjanda mýnıtsıpalıtet saılaýynyń merzimi belgili boldy
BAKÝ. KAZINFORM — Ázerbaıjanda mýnıtsıpaldy saılaý 2025 jyldyń 29 qańtarynda ótedi. Bul týraly eldiń Ortalyq saılaý komıssııasynyń (OSK) kezekti otyrysynda málim boldy, dep habarlaıdy Kazinform menshikti tilshisi.
Otyrysta sóz sóılegen OSK tóraǵasy Mazahır Panahov elde kezekti mýnıtsıpaldyq saılaýdy 2025 jyldyń 29 qańtarynda ótkizýdiń oryndylyǵyn atap ótti. Usynys daýysqa salynyp, biraýyzdan qabyldandy.
«Biz sondaı-aq azamattardy mýnıtsıpaldyq saılaýǵa, onyń ishinde kandıdat retinde belsendi qatysýǵa shaqyramyz», — dep qosty OSK tóraǵasy.
OSK hatshysy Arıfa Muhtarovanyń aıtýynsha, vedomstvo saılaýǵa daıyndalý jónindegi negizgi áreketter men is-sharalardyń kúntizbelik josparyn bekitti.
«Saılaý naýqany protsesi 6 qańtarda bastalyp, 28 qańtarda saǵat 00:00-de toqtatylady. Saılaý bıýlletenderi 19 qańtarǵa deıin daıyn bolady», — dedi ol.
Ázerbaıjan Respýblıkasynda sońǵy mýnıtsıpaldy saılaý 2019 jyldyń jeltoqsan aıynda ótti. Ol kezde ózin-ózi basqarý organdaryna 15154 adam saılandy.
Saılaý kodeksine sáıkes, mýnıtsıpalıtetter bes jyldyq mandatqa ıe jáne saılaý osy merzimde ótýi tıis. Bul rette saılaý protsesi merzimderin keıinge qaldyrý elde COP29 konferentsııasyn ótkizýmen baılanystyryp otyr.
Aıta ketý kerek, Ázerbaıjanda sońǵy jyldary mýnıtsıpalıtetterdi irilendirý saıasaty júrgizilip keledi. Bıyl kóktemde mýnıtsıpalıtetterdi biriktirýdi kózdeıtin zańnamadaǵy ózgeristerden keıin olardyń sany 1400-den 685-ke deıin qysqardy.
Eske salsaq, buǵan deıin Ázerbaıjan 2025 jyly qorǵanysqa bólinetin qarajatty ulǵaıtýǵa nıetti ekeni habarlandy.