Ázerbaıjan ushý qaýipsizdigi baqylaýyn kúsheıtpekshi
ASTANA.KAZINFORM - Ázerbaıjan parlamenti azamattyq avıatsııanyń ushý qaýipsizdigine qaýip tóndirgenderge aıyppuldy ulǵaıtý múmkindigin talqylap jatyr, dep habarlaıdy Kazinform tilshisi.
Ákimshilik quqyq buzýshylyq týraly kodekske engizilgen tıisti túzetýlerdi Quqyqtyq saıasat jáne memlekettik qurylys komıteti talqylady.
Qujatqa sáıkes, pırotehnıkalyq zattardy ruqsatsyz ushyrý, sondaı-aq qustardyń jappaı jınalýyna yqpal etetin obektiler jasaý quqyq buzýshynyń (jeke, zańdy nemese laýazymdy tulǵa) mártebesine qaraı 3 myńnan 10 myń manatqa deıin (1800-5900 AQSh dollary) aıyppul salýǵa ákep soǵady.
Qazirgi ýaqytta bul buzýshylyqtar úshin jalpy aıyppul mólsheri nebári 50 manatty (30 dollar) quraıdy.
Avıatsııalyq oqıǵalar men ıntsıdentterdi tergeý jónindegi turaqty komıssııanyń qyzmetine aralasý úshin 1 myńnan 10 myń manatqa deıin (590-5900 AQSh dollary) aıyppul qarastyrylǵan.
Avıatsııa personalyna qoıylatyn talaptardy buzǵany úshin jańa aıyppul belgilenip jatyr. Tıisti qujaty (sertıfıkaty, jeke kýálik jáne kýáligi) joq tulǵalardy azamattyq avıatsııaǵa jumysqa qabyldaǵany úshin tártip buzýshylarǵa 3000-nan 20000 manatqa deıin (1800-11700 AQSh dollary) aıyppul salynady.
Ekıpajdar men dıspetcherlerge olardyń tıisti daıyndyqtan (jattyǵýlar men medıtsınalyq tekserýden) ótýin qamtamasyz etpegeni úshin 4000 manat (2300 AQSh dollary) kóleminde aıyppul salý usynylady. Zańdy tulǵalar úshin bul soma 30 myń manatty (17 600 dollar) quraıdy.
Azamattyq áýejaılardy nemese aerodromdardy, sondaı-aq sertıfıkaty joq tikushaq alańdaryn paıdalanǵany úshin 3-4 myń (1800-2300 dollar) men 20-40 myń manat (11700-23500 dollar) aralyǵynda aıyppul salynady.
Túzetýler ekıpaj múshelerine de qatysty. Eger ekıpaj múshesi ushý aldynda alkogol, esirtki, psıhotroptyq nemese qaýipsizdikke nuqsan keltiretin dári-dármek tutynsa nemese bekitilgen tizimdegi aýrýǵa shaldyqqan bolsa, oǵan 3000 manat (1800 dollar) kóleminde aıyppul salynady.
Aıta keteıik, 25 jeltoqsanda Aqtaý mańynda, Bakýden Groznyıǵa baǵyt alǵan AZAL jolaýshylar ushaǵy apatqa ushyraǵan bolatyn. Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.