Ázerbaıjan qaýipsizdik kúshteri lańkestik árekettiń aldyn aldy
ASTANA.KAZINFORM - Ustalǵandar Ázerbaıjannyń soltústigindegi Hıl, Djıbır jáne ıAsab aýyldarynda jerasty qoımalaryn jasap, onda qarý-jaraq, oq-dári men jarylǵysh zattar saqtaǵan. Bul týraly eldiń Memlekettik qaýipsizdik qyzmeti (MQQ) men Іshki ister mınıstrligi habar taratty.
ÁR arnaıy qyzmeti Ǵusar aýdanynda halyqaralyq terrorıstik uıymdarmen baılanysy bar radıkaldy dinı-ekstremıstik top múshelerin joıý operatsııasy júrgizilgenin habarlady.
— Júrgizilgen jedel-izdestirý is-sharalarynyń nátıjesinde top músheleri buryn «Aǵaıyndy ormanshylar» lańkestik tobynyń qyzmetine qatysqany úshin sottalǵan Gadır Gadjıevpen qylmystyq kelisimge kelgeni anyqtaldy. Joǵaryda atalǵan tulǵalar Ǵusar aýdany aýmaǵynda terrorlyq akt josparlap, Hıl, Djıbır jáne ıAsab aýyldaryn qamtıtyn orman alqabynda jerasty baspana jasap, onda qarý-jaraq, oq-dári, jarylǵysh zattar, tehnıkalyq quraldar jáne basqa da quraldar saqtaǵan, - delingen vedomstvo habarlamasynda.
Tergeý barysynda qylmystyq uıymǵa qatysy bar tulǵalar, uıym qurylymy, josparlary jáne olardyń qyzmetiniń basqa da dálelderi anyqtaldy.
Aldyn ala málimet boıynsha, qylmyskerler ammıak selıtrasyn, tez tutanatyn shymtezek, jarǵyshtar men tutaný symdaryn zańsyz ıemdenip, olardy qonaqúıler men kólik jýý oryndarynda saqtaý úshin qoldan jasalǵan jarylǵysh qurylǵylardy paıdalanǵan.
Radıkaldy toptyń bir bóligi ustalǵan kezde qarýly qarsylyq kórsetip, sol sebepti joıylǵany habarlandy. Sonymen qatar, toptyń alty múshesi qamaýǵa alynyp, olarǵa Ázerbaıjan Qylmystyq kodeksiniń úsh baby boıynsha aıyp taǵyldy.
Tergeý jáne jedel-izdestirý sharalary jalǵasyp jatyr.
Ótken jyldyń maýsym aıynda Ázerbaıjannyń Memlekettik qaýipsizdik qyzmeti memlekettik organdar atynan jalǵan aqparat taratatyn kıberqylmystyq jelini áshkereledi. Shabýyl jasaýshylar jasandy ıntellekt – deepfake tehnologııalaryn qoldanyp, Ázerbaıjan prezıdentiniń atynan jalǵan beıne málimdemeler daıyndaǵan.
Sáýir aıynda Qazaqstanǵa halyq tutynatyn taýarlardy kontrabandalaýmen aınalysqan qylmystyq toptyń basshysy Ázerbaıjannan Qazaqstanǵa ekstradıtsııalanǵan bolatyn.
Keltirilgen shyǵyn 4 mıllıard teńgeden asty.
Sonymen qatar Ázerbaıjannan Qazaqstanǵa aqsha aýdarymdarynyń kólemi 50%-ǵa óskeni týraly jazǵan bolatynbyz.