Ázerbaıjan eski kólikterdi elge kirgizýge qoıylatyn talaptardy kúsheıtti
ASTANA. KAZINFORM — 2026 jyldyń 1 qańtarynan bastap Ázerbaıjanda jeti jyldan asqan ımporttalatyn jeńil kólikterge jańa aktsızdik mólsherlemeler kúshine enedi, dep habarlaıdy Kazinform menshikti tilshisi.
Ózgerister eldiń Salyq kodeksine engizilgen túzetýler jobasynda qamtylǵan jáne kólik parkin jańartýǵa, eskirgen kólik quraldary ımportyn qysqartýǵa jáne ekologııalyq taza modelder kirgizýdi yntalandyrýǵa baǵyttalǵan.
Qoldanystaǵy zańnamaǵa sáıkes, jeti jyldan asqan kólikti kirgizý kezinde benzın qozǵaltqyshtary úshin 1,2 jáne dızeldi qozǵaltqyshtar úshin 1,5 koeffıtsıenti qoldanylady. Túzetýler kúshine engennen keıin bul koeffıtsıentter sáıkesinshe 1,5 jáne 2-ge deıin artady. Osylaısha, eski dızeldi kólikterge aktsızdik aýyrtpalyq aıtarlyqtaı artady.
Salyq kodeksine sáıkes, aktsızdiń bazalyq mólsherlemeleri kólik qozǵaltqyshynyń kólemine baılanysty.
Qozǵaltqysh kólemi 2000 tekshe sm-ge deıingi kólikter úshin mólsherleme árbir tekshe santımetri úshin 0,30 manat. Qozǵaltqysh kólemi 2001-den 3000 tekshe sm-ge deıingi kólikter úshin mólsherleme — 600 manat jáne 2000-nan joǵary tekshe santımetrine 600 manat jáne 5 manat bolady. Qozǵaltqysh kólemi 3001-den 5000 tekshe sm-ge deıingi kólikter úshin mólsherleme — 18 600 manat jáne 35 manat, al qozǵaltqysh kólemi 5000 tekshe sm-den asatyn kólikter úshin mólsherleme — 53600 manat jáne osy shekten joǵary árbir tekshe santımetri úshin 70 manat bolady.
Qozǵaltqysh kólemi 3000 tekshe sm-den asatyn úsh jyldan asqan kólikter úshin joǵary mólsherlemeler qoldanylady: 5600 manat + árbir tekshe sm úshin 15 manat (3001-den 4000-ǵa deıin), 20 600 manat + 40 manat (4001-den 5000-ǵa deıin) jáne 5000-nan asatyn ár tekshe sm úshin 60 600 manat + 80 manat.
Basqasha aıtqanda, kólik neǵurlym eski jáne qýatty bolsa, aktsız salyǵy soǵurlym joǵary bolady. Memleket osylaısha jańa, ekologııalyq taza kólikterdi satyp alýdy yntalandyryp otyr.
Buǵan deıin Ázerbaıjanda avtokólik ákelýge shekteý engizilýi múmkin ekenin jazǵan edik.